ஸ்ரீரங்கம் வைகுண்ட ஏகாதசி விழா – நாச்சியாா் திருக்கோலத்தில் நம்பெருமாள்..

  108 வைணவத் திருத்தலங்களில் முதன்மையானதும், பூலோக வைகுண்டம் என போற்றப்படும் திருச்சி ஸ்ரீரங்கம் அரங்கநாதர் கோவிலில் வைகுண்ட ஏகாதசி திருவிழா திருநெடுந்தாண்டக நிகழ்ச்சியுடன் கடந்த 12-ம் தேதி தொடங்கியது. இன்று பகல் பத்து பத்தாம் திருநாள் நடைபெறுகிறது. பகல்பத்து உற்சவத்தின் 10-வது நாளான இன்று காலை உற்சவர் நம்பெருமாள் நாச்சியார் திருக்கோலம் எனப்படும் சிறப்பு அலங்காரத்தில் சௌரிக் கொண்டை அணிந்து சூர்ய சந்திர வில்லை, கலிங்கத்துராய், தலைக்காப்பு, வைர மாட்டல், தோடு, பங்குனி உத்திர பதக்கம், திருமாங்கல்யம், அடுக்கு பதக்கங்கள், பவள மாலை, 6 வட முத்துமாலை, நெல்லிக்காய் மாலை, வலது திருக்கையில் கோலக்கிளி, இடது திருக்கையில் வளை காப்பு, காடகம், தாயத்து தொங்கல், திருச்சுட்டிகள் அணிந்து வெண்பட்டு உடுத்தி திருவடியில் தண்டை, சதங்கை அணிந்து, பின் சேவையில் – புஜ கீர்த்தி, அரைச் சலங்கை, ஜடை நாகம், ராக்கொடி, ஏலக்காய் தாண்டா அணிந்து சேவை சாதிக்கிறார். நம்பெருமாள் அர்ஜுன மண்டபத்தில் மாலை வரை ஆஸ்தானமிருப்பார்.

மாலை 5 மணிக்குமேல் நான்காம் பிரகாரம் வலம் வந்து கருட மண்டபத்தில் பக்தர்களுக்கு சேவை சாதிப்பார். இரவு 8 மணிக்குமேல் ஆழ்வார், ஆச்சார்யர்கள் மரியாதைக்கு பிறகு 9 மணியளவில் மூலஸ்தானம் சேருவார். வைகுண்ட ஏகாதசி விழாவிற்கான ஏற்பாடுகளை ஸ்ரீரங்கம் கோவில் இணை ஆணையர் மாரியப்பன் தலைமையில் அர்ச்சகர்கள், ஸ்தானீகர்கள், கைங்கர்யபரர்கள், அலுவலர்கள், பணியாளர்கள் மற்றும் உபயதாரர்கள் உள்ளிட்ட ஒருங்கிணைப்பாளர்கள் செய்து, வருகின்றனர்.