சிலர் எங்கள் மீது துரோக பட்டத்தை சூட்டுகிறார்கள்…* திருச்சியில் திருமாவளவன் பேட்டி…!

விடுதலை சிறுத்தைகள் கட்சியின் தலைவரும், சிதம்பரம் நாடாளுமன்ற உறுப்பினருமான தொல்.திருமாவளவன் அரியலூர் மாவட்ட ஆட்சியர் அலுவலகத்தில் நடைபெற உள்ள ஆய்வுக் கூட்டத்தில் பங்கேற்பதற்காக சென்னையில் இருந்து விமானம் மூலம் திருச்சிக்கு இன்று (செப்டம்பர் 15) வருகை தந்தார். அப்போது அவர் செய்தியாளர்களுக்கு அளித்த பேட்டியில் கூறியதாவது:- காய்ச்சலால் பாதிக்கப்பட்டுள்ள திமுக தலைவர் முக.ஸ்டாலின் விரைவில் குணமடைவார். திமுக ஆர்ப்பாட்ட மேடைகளில் ஆ.ராசா மற்றும் சேகர் பாபு ஆகியோர் அரசியல் விமர்சனங்களைத் தாண்டி தனிநபர் ரீதியாகவும், பிறப்பு குறித்தும் கொச்சையாக விமர்சித்தது அதிர்ச்சி அளிக்கிறது. முன்னாள் முதலமைச்சர் அண்ணா, கலைஞர் மற்றும் பெரியார் ஒருபோதும் நாகரீக வரம்பை மீறியதில்லை. ஆனால் தற்போது இவர்கள் பேசிய பேச்சு பொதுமக்களிடையே முகம் சுளிக்க வைப்பதாக உள்ளது. சிதம்பரத்தில் அம்பேத்கர் சிலை சேதப்படுத்தப்பட்டு உள்ளது. புதியதோர் இந்தியாவை கட்டமைக்க வேண்டும் என்ற கனவு கண்டவர் அம்பேத்கர். விளிம்புநிலை மக்களுக்காகவும், ஓபிசி சமூகத்தினருக்காகவும் தன் அமைச்சர் பதவியையே ராஜினாமா செய்துவிட்டுப் போராடிய அம்பேத்கரின் வரலாற்றை அறியாதவர்களே இதுபோன்ற செயல்களில் ஈடுபடுகின்றனர். தமிழகத்தில் மின்வெட்டு நிலவுவது உண்மைதான் . அரசு இதிலே கூடுதல் கவனம் செலுத்தி சீரமைக்க நடவடிக்கை எடுக்க வேண்டும். இடைத்தேர்தல்களில் பணத்தை கொட்டி வாக்குகளை விலைக்கு வாங்கும் கலாச்சாரம் ஜனநாயகத்திற்கு ஆரோக்கியமற்றது. இந்த இடைத்தேர்தலில் அப்படி நடக்க கூடாது. இதனைத் தடுத்து நிறுத்த தேர்தல் ஆணையம் தீவிரக் கவனம் செலுத்த வேண்டும். அரசு பேருந்துகளில் தவெக வர்ணம் பூசப்பட்டுள்ளது ஏற்புடையதல்ல. திமுக கூட்டணியில் நாங்கள் நீண்ட காலமாக பயணித்துள்ளோம். நாங்கள் எப்படி பணியாற்றுவோம் என ஸ்டாலின் உள்ளிட்ட தலைவர்களுக்கு தெரியும். ஆனால் திமுகவுக்கு ஆதரவாக பேசுகிறோம் என்ற பெயரில் சில பேர் எங்கள் மீது தேவையில்லாத அவதூறுகளை பரப்புகிறார்கள். துரோக பட்டத்தை சூட்டுகிறார்கள். திமுக கூட்டணியில் இருந்து பதவிக்காக நாங்கள் வெளியேறினோம் என்பதைப் போன்ற ஒரு தவறான தோற்றத்தை உருவாக்குவது சரியானது அல்ல. என்னுடைய தலைமைத்துவத்தின் மீது நடத்தப்படும் தாக்குதல் ஆக இதை பார்க்கிறேன் என தெரிவித்தார்.