திருச்சி விமான நிலையத்தில் மயங்கி விழுந்த பயணி உயிரிழப்பு…!

மலேசியா சிலாங்கூர் பகுதியைச் சேர்ந்தவர் ராஜலிங்கம் (வயது 68). இவர் கடந்த 20-ந் தேதி மலேசியாவில் இருந்து திருச்சிக்கு வந்தார். பின்னர் தனது சொந்த ஊரான திண்டுக்கல் மாவட்டம் நத்தம் மதுரை மெயின் ரோடு கோவில்பட்டிக்கு சென்றார். பின்னர், மீண்டும் மலேசியா செல்வதற்காக திருச்சி விமான நிலையத்திற்கு மனைவி அமுதாவுடன் வந்திருந்தார். இருவரும் மலேசியா செல்லும் ஏர் ஏசியா விமானத்தில் பயணம் செய்வதற்காக விமான நிலையத்தில் அமர்ந்திருந்தனர். அப்போது திடீரென ராஜலிங்கம் மயங்கி விழுந்தார். இதனை பார்த்து அதிர்ச்சியடைந்த அமுதா, அவரை உடனடியாக திருச்சி விமான நிலையத்தில் உள்ள தனியார் அவசர சிகிச்சை மையத்திற்கு அழைத்து சென்றார். அங்கு அவரை பரிசோதித்த மருத்துவ ஊழியர்கள், ராஜலிங்கம் இறந்து விட்டதாக தெரிவித்தனர். இதுகுறித்து ஏர்போர்ட் போலீசார் வழக்கு பதிவு செய்து விசாரணை நடத்தி வருகின்றனர். பயணி உயிரிழந்த சம்பவத்தால் விமான நிலையத்தில் சிறிது நேரம் பரபரப்பு நிலவியது.