அரசு பெண் அதிகாரி மீது நாற்காலியை தூக்கி வீசிய திமுக பிரமுகர் அதிரடி கைது…! ( வீடியோ இணைப்பு)

சிவகங்கை அருகேயுள்ள சித்தலூரைச் சேர்ந்தவர் முருகன். திமுக பிரமுகரான இவர், ஒப்பந்ததாரராக உள்ளார். பெருங்குடி ஊராட்சியில் ரூ.10 லட்சத்தில் சிமென்ட் சாலை அமைக்கும் பணியில் ஈடுபட்ட முருகன், பணி முடிந்து விட்டதாகவும், பணத்தை விடுவிக்குமாறும் சிவகங்கை ஊராட்சி ஒன்றிய அலுவலகத்தில் இருந்த உதவிப் பொறியாளர் கிருஷ்ணகுமாரியிடம் கேட்டுள்ளார்.  பணி அனுமதி உள்ளிட்ட ஆவணங்களை எடுத்து வருமாறு உதவிப் பொறியாளர் தெரிவித்ததால், அவர்களிடையே வாக்குவாதம் ஏற்பட்டுள்ளது.  ஒரு கட்டத்தில் ஆத்திரமடைந்த முருகன், அருகே இருந்த நாற்காலியை எடுத்து கிருஷ்ணகுமாரி மீது வீசினார். அவர் உடனே விலகிக் கொண்டதால் காயம் ஏதும் ஏற்படவில்லை.  இதனை கண்டித்து, தமிழ்நாடு ஊரக வளர்ச்சித் துறை அலுவலர்கள் சங்க மாவட்டச் செயலாளர் ராதாகிருஷ்ணன் தலைமையிலான ஊழியர்கள் பணியைப் புறக்கணித்து, ஒன்றிய அலுவலகத்தில் காத்திருப்பு போராட்டத்தில் ஈடுபட்டனர். மேலும், அதிகாரியைத் தாக்க முயன்ற முருகனை உடனடியாக கைது செய்ய வலியுறுத்தி ஆர்ப்பாட்டத்தில் ஈடுபட்டனர்.  பின்னர், இது தொடர்பாக சிவகங்கை நகர் காவல் நிலையத்தில் கிருஷ்ணகுமாரி புகார் கொடுத்தார்.  புகாரின்பேரில்,  சிவகங்கை நகர் போலீஸார் வழக்கு பதிவு செய்து, முருகனைத் தேடி வந்தனர். இந்நிலையில் தலைமறைவாக இருந்த முருகனை போலீஸார் கைது செய்தனர். இந்த சம்பவம் குறித்த வீடியோ சமூக வலைதளங்களில் வைரலானது.