பொள்ளாச்சியில் இளம் பெண்கள் பாலியல் வன்கொடுமை வழக்கு: குற்றவாளிகள் 9 பேருக்கும் சாகும் வரை ஆயுள் தண்டனை- * கோவை மகிளா நீதிமன்றத்தில் பரபரப்பு தீர்ப்பு…!

கோயம்புத்தூர் மாவட்டம், பொள்ளாச்சி கிழக்கு காவல் நிலையத்தில் கடந்த 2019-ம் ஆண்டு பிப்ரவரி மாதம் 12-ம் தேதி 19 வயதான கல்லூரி மாணவி ஒருவர் புகார் ஒன்றை அளித்திருந்தார். அதில், “தனக்கு ஏற்கனவே பழக்கமான சபரிராஜன் என்பவருடன் காரில் சென்றபோது சபரிராஜனுடன் இருந்த திருநாவுக்கரசு, சதீஷ் மற்றும் வசந்தகுமார் ஆகிய 4 பேரும் தன்னை பாலியல் ரீதியாக துன்புறுத்தி வீடியோ எடுத்து மிரட்டல் விடுத்தனர் எனத் தெரிவித்திருந்தார். இதேபோல அந்த கும்பல் இளம்பெண்கள், கல்லூரி மாணவிகள் எனப் பலரையும் பாலியல் ரீதியாகத் துன்புறுத்தி வீடியோ எடுத்து மிரட்டி வந்துள்ளனர். இந்த சம்பவம் தமிழகத்தில் பெரும் பரபரப்பை ஏற்படுத்தியது. இந்த வழக்கை பொள்ளாச்சி அனைத்து மகளிர் காவல் நிலைய போலீசார் விசாரித்து வந்தனர். பின்னர், சிபிசிஐடிக்கு மாற்றம் செய்யப்பட்டது. அதனைத்தொடர்ந்து இந்த வழக்கு சிபிஐ வசம் ஒப்படைக்கப்பட்டது. சி.பி.ஐ. அதிகாரிகள் பாலியல் வன்கொடுமை, கூட்டுச்சதி உள்ளிட்ட 8 பிரிவுகளின் கீழ் வழக்குப்பதிவு செய்து விசாரணை மேற்கொண்டனர். இந்த வழக்கில் திருநாவுக்கரசு, சபரிராஜன், சதீஷ், மணிவண்ணன், ஹேரன்பால், பாபு, அருளானந்தம், அருண்குமார் மற்றும் வசந்தகுமார் என மொத்தம் 9 பேர் கைது செய்யப்பட்டு சேலம் மத்தியச் சிறையில் அடைக்கப்பட்டனர். இந்த வழக்கில் அரசு சார்பில் 50 சாட்சிகள், 200 ஆவணங்கள், 40க்கும் மேற்பட்ட மின்னணு தரவுகள் முக்கிய சாட்சியாக இடம்பெற்றன. இந்த வழக்கின் விசாரணையானது கோவை ஒருங்கிணைந்த நீதிமன்ற வளாகத்தில் உள்ள மகிளா கூடுதல் நீதிமன்றத்தில் நடைபெற்று வந்தது. இந்த வழக்கில் சுமார் 1,500 பக்கங்கள் கொண்ட குற்றப்பத்திரிகை சி.பி.ஐ. சார்பில் நீதிமன்றத்தில் தாக்கல் செய்யப்பட்டது. அதன்படி, இந்த வழக்கில் அரசு மற்றும் குற்றம் சாட்டப்பட்டவர்களின் தரப்பு என இருதரப்பு வாதங்களும், அரசு சார்பில் பதில் வாதமும் கடந்த ஏப்ரல் மாதம் 28.04.2025 அன்று முடிவடைந்தது. இதனையடுத்து இந்த வழக்கின் தீர்ப்பு இன்று (13-05-2025) வழங்கப்படும் என நீதிமன்றம் தெரிவித்திருந்தது. இந்நிலையில் நீதிபதி நந்தினி தேவி இன்று தீர்ப்பு வழங்கினார். அதில், “இந்த வழக்கில் குற்றம்சாட்டப்பட்ட 9 பேரும் குற்றவாளிகள் என தீர்ப்பளித்தார். பின்னர் அவர்களுக்கான தண்டனை விவரம் பிற்பகல் 12 மணிக்கு வாசிக்கப்பட்டது. அப்போது குற்றவாளிகள் 9 பேருக்கும் சாகும் வரை மரண தண்டனை விதித்து நீதிபதி நந்தினி தேவி தீர்ப்பளித்தார்.