சர்ச்சை கருத்துகளுக்கு நடுவில் தீர்ப்பு..!- ‘கருப்பு’ பட வழக்கு தள்ளுபடி…

‘கருப்பு’ திரைப்படத்திற்கு தடை கோரிய வழக்கை சென்னை உயர் நீதிமன்றம் தள்ளுபடி செய்துள்ளது. அதே நேரத்தில், தீர்ப்பில் நீதித்துறையைப் பற்றிய சில கருத்துகள் சமூக வலைதளங்களில் பெரும் விவாதத்தை ஏற்படுத்தியுள்ளது. வழக்கறிஞர் ஒருவர், ‘கருப்பு’ திரைப்படத்தில் நீதித்துறையை அவமதிக்கும் வகையில் காட்சிகள் இடம்பெற்றுள்ளதாகக் கூறி, படத்தை தடை செய்ய வேண்டும் என சென்னை உயர் நீதிமன்றத்தில் வழக்கு தொடர்ந்திருந்தார். இந்த வழக்கை நீதிபதிகள் ஜி.ஆர். சுவாமிநாதன் மற்றும் வி. லட்சுமி நாராயணன் அடங்கிய அமர்வு விசாரித்தது. விசாரணையின் போது, படம் ஒரு கற்பனை நீதிமன்றத்தை அடிப்படையாகக் கொண்டு உருவாக்கப்பட்டதாகவும், அது ஒட்டுமொத்த நீதித்துறை அமைப்பை பிரதிபலிக்கவில்லை என்றும் நீதிபதிகள் தெரிவித்தனர். மேலும், திரைப்படங்களில் மிகைப்படுத்தப்பட்ட காட்சிகள் வழக்கமானவை என்றும், அவற்றை கலைச்சுதந்திரத்தின் பகுதியாகவே பார்க்க வேண்டும் என்றும் கூறினர். தீர்ப்பில், “நீதித்துறையில் ஊழல் இல்லையென்று யாரும் முழுமையாக மறுக்க முடியாது” என்ற கருத்து தொடர்பாகவும் விவாதம் எழுந்துள்ளது. இதேசமயம், ஊழல் இருப்பினும் நீதித்துறை அமைப்பு அதனை எதிர்கொண்டு நடவடிக்கை எடுத்து வருவதாகவும் நீதிபதிகள் குறிப்பிட்டனர். மேலும், சமூக ஊடக காலத்தில் தவறான அல்லது மிகைப்படுத்தப்பட்ட கருத்துகள் பரவுவது இயல்பு என்றும், அவற்றை பெரிதுபடுத்தாமல் நீதித்துறை தனது பணியை தொடர்ந்து மேற்கொண்டு செல்ல வேண்டும் என்றும் தீர்ப்பில் தெரிவிக்கப்பட்டது. இறுதியில், ‘கருப்பு’ திரைப்படத்தில் நீதிமன்ற அவமதிப்பு நோக்கம் இல்லை எனக் கூறி, தடை கோரிய மனு முழுமையாக தள்ளுபடி செய்யப்பட்டது.