சென்னையில் பயங்கரம்: இளம் பெண் துண்டு துண்டாக வெட்டி உடல் பாகங்களை சூட்கேஸில் திணித்து வீசி சென்ற மர்ம நபர்களுக்கு வலை…!

சென்னையை அடுத்த துரைப்பாக்கம் குமரன் நகர் குடியிருப்பு பகுதியில் சந்தேகத்திற்கு இடமளிக்கும் வகையில் ரத்த கறைகளுடன் சூட்கேஸ் ஒன்று கிடந்தது. இது குறித்து அப்பகுதி மக்கள் துரைப்பாக்கம் காவல் நிலையத்திற்கு தகவல் கொடுத்தனர். தகவலின்பேரில் சம்பவ இடத்துக்கு விரைந்து வந்த போலீசார், ரத்த கறைகளுடன் கிடந்த சூட்கேசை திறந்து பார்த்தபோது அதில் பெண் ஒருவரின் துண்டு துண்டாக வெட்டப்பட்ட உடல் பாகங்கள் இருந்தது தெரியவந்தது. இதனைப் பார்த்து அதிர்ச்சியடைந்த போலீசார், அந்த உடல் பாகங்களை ராயப்பேட்டை அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.மேலும், அந்த உடல் பாகங்களில் உள்ள அடையாளங்களை வைத்து அந்த பெண் யார் என போலீசார் விசாரணை நடத்தி வருகின்றனர்.சென்னையில் இளம் பெண்ணை துண்டு துண்டாக வெட்டி சூட்கேசில் அடைத்து வீசி சென்ற மர்ம நபர்கள் யார்? எதற்காக கொலை செய்தனர் என்று போலீசார் தொடர்ந்து விசாரணை நடத்தி வருவதோடு அவர்களை வலை வீசி தேடி வருகின்றனர். இந்த கொலை சம்பவம் சென்னையில் பெரும் பரபரப்பை ஏற்படுத்தி உள்ளது. இந்தநிலையில் போலீசாரின் முதல் கட்ட விசாரணையில் கொலை செய்யப்பட்டவர் சென்னை மணலி பகுதியைச் சேர்ந்த தீபா (வயது 32) என்பது தெரிய வந்துள்ளது.