தண்ணீர் இல்லாததால் திறக்கப்படாத மேட்டூர் அணை: குறுவை சிறப்பு தொகுப்பை அறிவித்த முதல்வர் விஜய்…!

காவிரி டெல்டா மாவட்டங்களில் குறுவை சாகுபடி பாசனத்திற்காக, வழக்கமாக ஜூன் 12-ம் தேதி திறக்கப்படும் மேட்டூர் அணை, இந்த ஆண்டு குறிப்பிட்ட தேதியில் திறக்கப்படாது என்று நீர்வளத்துறை அதிகாரப்பூர்வமாக அறிவித்துள்ளது. அணையில் போதிய நீர் இருப்பு இல்லாத காரணத்தினாலேயே இந்த இக்கட்டான முடிவு எடுக்கப்பட்டுள்ளதாகத் தெரிவிக்கப்பட்டுள்ளது. ஒவ்வொரு ஆண்டும் ஜூன் 12-ல் அணை திறக்கப்படுவது வழக்கமாக இருந்தாலும், இந்த முறை நீர்மட்டம் குறைவாக உள்ளதால் பாசனத்திற்கு தண்ணீர் திறக்க வாய்ப்பில்லை என அதிகாரிகள் திட்டவட்டமாகக் கூறியுள்ளனர். பொதுவாக மேட்டூர் அணையின் நீர்மட்டம் 90 அடியாக இருந்தால் மட்டுமே, தென்மேற்குப் பருவமழையை எதிர்நோக்கி ஜூன் 12 அன்று குறுவை சாகுபடிக்குத் தண்ணீர் திறக்கப்படுவது வழக்கம். ஆனால், தற்போதைய நிலவரப்படி மேட்டூர் அணையின் நீர்மட்டம் வெறும் 79 அடியாகவும், அதன் கொள்ளளவு 41 டி.எம்.சி-யாகவும் மொத்த கொள்ளளவு 93.47 டி.எம்.சி மட்டுமே உள்ளது. அதாவது அணையின் மொத்த கொள்ளளவில் 50 சதவீதத்திற்கும் குறைவாகவே நீர் இருப்பு உள்ளதாலும், தென்மேற்குப் பருவமழை தீவிரமடைவதில் ஏற்பட்டுள்ள தாமதத்தாலும் திட்டமிட்டபடி அணை மதகுகளைத் திறக்க சாத்தியமில்லை என நீர்வளத்துறை விளக்கம் அளித்துள்ளது. மேட்டூர் அணை உரிய தேதியில் திறக்கப்படாததால் தஞ்சை, திருவாரூர், நாகை, மயிலாடுதுறை உள்ளிட்ட 12 காவிரி டெல்டா மாவட்டங்களைச் சேர்ந்த லட்சக்கணக்கான விவசாயிகள் மற்றும் விவசாயத் தொழிலாளர்கள் பெரும் கவலை அடைந்துள்ளனர். அணை திறப்பு தள்ளிப்போவதால் குறுவை சாகுபடி இலக்கு மற்றும் நெல் உற்பத்தி கடுமையாகப் பாதிக்கப்படும் என அஞ்சப்படுகிறது. இருப்பினும், தென்மேற்குப் பருவமழை தீவிரமடைந்து கர்நாடக அணைகளில் இருந்து காவிரி ஆற்றில் நீர்வரத்து அதிகரித்த பின்னரே, ஆகஸ்ட் இறுதி அல்லது செப்டம்பர் மாதத் தொடக்கத்தில் பாசனத்துக்கு தண்ணீர் திறக்கப்படும் என அதிகாரிகள் வட்டாரங்கள் தெரிவிக்கின்றன.

இந்நிலையில் ரூ.134 கோடி மதிப்பீட்டில் குறுவை சிறப்புத் தொகுப்பு திட்டம் செயல்படுத்தப்படும் என தமிழக முதல்வர் விஜய் அறிவிப்பு வெளியிட்டுள்ளார். காவிரிப்பிடிகை மற்றும் காவிரிப்படையை அல்லாத மாவட்டங்களில் நெல் சாகுபடியை ஊக்குவிக்கும் வகையில் ரூ.134.53 கோடி மதிப்பீட்டில் குறுவை சிறப்புத் தொகுப்பு திட்டம் செயல்படுத்தப்படும் என தெரிவித்துள்ளார்.