சட்டமன்ற தேர்தல் பணிகளில் ஈடுபட்ட ஊழியர்களுக்கு மதிப்பூதியம் வழங்குகிறது தமிழ்நாடு அரசு…* ரூ.7,500 முதல் ரூ.45,000 வரை கிடைக்கும்..!

நடந்து முடிந்த 2026 சட்டமன்றத் தேர்தலில் பணி செய்த அரசு ஊழியர்களுக்கு மதிப்பூதியம் வழங்கும் அறிவிப்பை தீபாவளியையொட்டி தமிழ்நாடு அரசு வெளியிட்டுள்ளது. இதற்காக ரூ.198 கோடி ஒதுக்கப்பட்டுள்ளதாக தெரிவிக்கப்பட்டுள்ளது. குறைந்தபட்சமாக ரூ.7,500, அதிகபட்சமாக ரூ.45,000 வரை ஊழியரின் வங்கி கணக்கில் வரவு வைக்கப்படும் எனக் குறிப்பிடப்பட்டுள்ளது. மதிப்பூதியம் கணக்கிடும் முறை தெளிவாக வரையறுக்கப்பட்டுள்ளது. 01.05.2026 அன்று அலுவலர்கள் பெற்ற அடிப்படை ஊதியத்தின் அடிப்படையில் இத்தொகை நிர்ணயிக்கப்படும். மாவட்ட வருவாய் அலுவலர்கள் உள்ளிட்ட உயர் அதிகாரிகளுக்கு ஒரு மாத அடிப்படை ஊதியம் அல்லது அதிகபட்சம் ரூ.45,000 என்ற அளவில் எது குறைவோ அந்தத் தொகை வழங்கப்படும். இதர பணியாளர்களுக்கு அதிகபட்சம் ரூ.30,000 வரை மதிப்பூதியம் கிடைக்கும். தகவல் தொழில்நுட்பப் பணியாளர்களுக்கு ரூ.20,000 என நிர்ணயிக்கப்பட்டுள்ளது. தேர்தல் பணிக்காலத்தையும் அடிப்படை ஊதியத்தையும் கணக்கில் கொண்டே இறுதித் தொகை முடிவு செய்யப்படும். வாக்குச்சாவடி ஏற்பாடுகள், வாக்காளர் பட்டியல் பராமரிப்பு, வாக்குப்பதிவு கண்காணிப்பு, வாக்கு எண்ணிக்கை உள்ளிட்ட பல்வேறு கட்டங்களில் ஆயிரக்கணக்கான அரசு ஊழியர்கள் தங்கள் வழக்கமான பணிகளுக்கு அப்பால் கூடுதல் பொறுப்புகளை ஏற்றுச் செயல்பட்டனர். இந்தக் கூடுதல் உழைப்பிற்கு உரிய அங்கீகாரம் அளிக்கும் நோக்கில் அரசு இந்த மதிப்பூதியத் திட்டத்தை அறிவித்துள்ளது. நிதி ஒதுக்கீடு செய்யப்பட்டவுடன் மாவட்ட நிர்வாகங்கள் மூலம் பயனாளிகளின் பட்டியல் தயாரிக்கப்பட்டு விரைவில் தொகை வழங்கப்படும் என தெரிகிறது. தேர்தல் பணிகளில் ஈடுபட்ட அனைத்துத் தரப்பு அலுவலர்களும் ஊழியர்களும் இந்த அறிவிப்பால் மகிழ்ச்சி அடைந்துள்ளனர்.