தீபாவளிக்கு பெரிய நடிகர்களின் படங்கள் இல்லாததால் ரசிகர்கள் ஏமாற்றம்- சிவகார்த்திகேயனின் “அமரன்” 900 தியேட்டர்களில் ரிலீஸ்…!

தீபாவளி என்றாலே புத்தாடை, இனிப்பு வகைகள், பலகாரங்கள், பட்டாசு என்பது தான் நினைவுக்கு வரும். அதற்கு அடுத்தபடியாக தங்களது அபிமான நடிகர்களின் படங்கள் தியேட்டரில் ரிலீஸ் ஆகும். எப்படியாவது நமது தலைவரின் படத்தை தீபாவளி நாளன்றே தியேட்டரில் பார்த்து விட வேண்டும் என்று காலை முதலே தியேட்டர் கவுண்டரில் காத்துக் கிடந்த நாட்கள் உண்டு. தீவிர ரசிகர்கள் மற்றும் ரசிகர் மன்றங்களில் இருப்பவர்கள் தங்களது தலைவரின் கட் அவுட்டுக்கு மாலை அணிவித்து பட்டாசு வெடித்து இனிப்பு வழங்கிய சம்பவங்களும் அரங்கேறும். ஆனால், இந்த தீபாவளிக்கு பெரிய நடிகர்களின் படங்கள் எதுவுமே இல்லை.
சிவகார்த்திகேயன் நடித்த அமரன், கவின் நடித்த பிளடி பெக்கர் உள்ளிட்ட ஒரு சில படங்கள் மட்டுமே ரிலீஸ் ஆகின்றன. இதனால் ரசிகர்கள் ஏமாற்றம அடைந்துள்ளனர். இந்தநிலையில் அமரன் திரைப்படம் முதன்முறையாக நாளை 900 தியேட்டர்களில் ரிலீஸ் ஆகிறது. இந்த படத்தை இயக்குனர் ராஜ்குமார் பெரியசாமி இயக்கியுள்ளார். இதில், சாய் பல்லவி கதாநாயகியாக நடித்துள்ளார். சிவகார்த்திகேயன் இந்த படத்தில் ‘முகுந்தன்’ என்ற கதாபாத்திரத்தில் ராணுவ வீரராக நடித்துள்ளார். ஜி.வி.பிரகாஷ் குமார் இசையமைத்துள்ளார். கமல்ஹாசனின் ராஜ்கமல் பிலிம் இன்டர்நேஷனல் நிறுவனம் இப்படத்தை தயாரித்துள்ளது. இந்த படத்தின் டீசரும், டிரெய்லரும் ஏற்கனவே வெளியாகி படத்தின் மீதான எதிர்பார்ப்பை அதிகப்படுத்தி இருக்கிறது. சமீபத்தில் இந்த படத்திற்கான டிக்கெட் முன்பதிவுகளும் தொடங்கப்பட்டு விறுவிறுப்பாக நடைபெற்று வருகிறது. டிக்கெட் முன்பதிவில் வசூலை வாரி குவித்துள்ளதாக தகவல் வெளியாகியிருக்கிறது. சிவகார்த்திகேயனின் முந்தைய படங்களை விட அமரன் திரைப்படம் அதிக வசூலை குவிக்கும் என்று எதிர்பார்க்கப்படுகிறது.