ரம்ஜான் பண்டிகையை முன்னிட்டு தமிழக பள்ளி தேர்வு தேதி திடீர் மாற்றம்…!

ரம்ஜான் பண்டிகையை முன்னிட்டு தமிழ்நாட்டில் 4 முதல் 9ம் வகுப்புகளுக்கான அறிவியல், சமூக அறிவியல் பாடத் தேர்வுகளுக்கான தேதியை மாற்றம் செய்து தமிழக பள்ளிக் கல்வித்துறை உத்தரவிட்டுள்ளது. தமிழக பள்ளிக் கல்வி பாடத்திட்டத்தில் 1 முதல் 9ம் வகுப்புகளுக்கான ஆண்டுத் தேர்வு மற்றும் மூன்றாம் பருவத் தேர்வு ஏப்ரல் 18 முதல் 30 ஆம் தேதி வரை நடத்தப்படும் என்று ஆண்டு அட்டவணையில் தெரிவிக்கப்பட்டிருந்தது. இந்த நிலையில், தமிழகத்தில் மக்களவைத் தேர்தலுக்கான வாக்குப்பதிவு ஏப்ரல் 19 ஆம் தேதி நடைபெறும் என தேர்தல் ஆணையம் அறிவித்துள்ளது. இதனையடுத்து தேர்தலுக்கு முன்பாக பள்ளி தேர்வுகளை நடத்தி முடித்திட தமிழக அரசு முடிவு செய்தது. இதனைத்தொடர்ந்து புதிய தேர்வுக் கால அட்டவணையை வெளியிட்டது. அதன்படி, 1 முதல் 9 ஆம் வகுப்புகள் வரை 2023-24 ஆம் கல்வி ஆண்டுக்கான ஆண்டு இறுதி தேர்வுகள் ஏப்ரல் 2 முதல் 12 ஆம் தேதி வரை நடைபெறும். ஏப்ரல் 13 ஆம் தேதி முதல் கோடை விடுமுறை விடப்படும் என்று அறிவிக்கப்பட்டிருந்தது. இந்த நிலையில் ரம்ஜான் பண்டிகையை முன்னிட்டு பள்ளி மாணவர்களுக்கான தேர்வு அட்டவணையில் மாற்றம் செய்து தமிழக பள்ளிக்கல்வித்துறை உத்தரவிட்டுள்ளது. அதன்படி, 4ம் வகுப்பு முதல் 9ம் வகுப்புகளுக்கான அறிவியல், சமூக அறிவியல் தேர்வுகளுக்கான தேதிகள் மாற்றம் செய்யப்பட்டுள்ளது. ஏப்ரல் 10ம் தேதி நடைபெற இருந்த அறிவியல் தேர்வு ஏப்ரல் 22ம் தேதிக்கும், ஏப்ரல் 12ம் தேதி நடைபெறவிருந்த சமூக அறிவியல் தேர்வு ஏப்ரல் 23ம் தேதிக்கும் மாற்றம் செய்து உத்தரவிடப்பட்டுள்ளது.