‘நான் முதல்வன்’ இனி இல்லை…? புதிய பெயரில் தொடரும் திட்டம்…

தமிழக மாணவர்களின் கல்வி, திறன் மேம்பாடு மற்றும் வேலைவாய்ப்பு வளர்ச்சிக்காக கடந்த திமுக ஆட்சியில் அறிமுகப்படுத்தப்பட்ட ‘நான் முதல்வன்’ திட்டத்தின் பெயர் தற்போது ‘திறன் தமிழ்நாடு’ (TN Skill) என மாற்றப்பட்டுள்ளது. ஆட்சி மாற்றத்திற்குப் பிறகு மேற்கொள்ளப்பட்ட இந்த நடவடிக்கை அரசியல் மற்றும் கல்வி வட்டாரங்களில் கவனத்தை ஈர்த்துள்ளது. தமிழ்நாடு திறன் மேம்பாட்டுக் கழகத்தின் கீழ் 2022ம் ஆண்டு தொடங்கப்பட்ட இந்த திட்டம், பள்ளி மற்றும் கல்லூரி மாணவர்களின் தொழில்நுட்பத் திறன், வேலைவாய்ப்பு திறன் மற்றும் தொழில் வழிகாட்டுதலை மேம்படுத்தும் நோக்கத்துடன் செயல்பட்டு வந்தது. இதன் மூலம் இலவச திறன் மேம்பாட்டுப் பயிற்சிகள், போட்டித் தேர்வுகளுக்கான பயிற்சிகள், வேலைவாய்ப்பு முகாம்கள் மற்றும் தொழில் ஆலோசனை சேவைகள் வழங்கப்பட்டு வருகின்றன. இந்நிலையில், தற்போது திட்டத்தின் பெயர் ‘திறன் தமிழ்நாடு’ என மாற்றப்பட்டுள்ளதுடன், ‘நான் முதல்வன்’ திட்டம் தொடர்பாக சமூக வலைதளங்களில் பதிவிடப்பட்டிருந்த பழைய பதிவுகள் மற்றும் வீடியோக்களும் நீக்கப்பட்டுள்ளன. தற்போது 2026 மே 15-ம் தேதிக்குப் பிறகு வெளியிடப்பட்ட பதிவுகள் மட்டுமே அதிகாரப்பூர்வ பக்கங்களில் இடம்பெற்றுள்ளன. தமிழ்நாட்டில் ஏற்பட்டுள்ள ஆட்சி மாற்றத்தைத் தொடர்ந்து இந்த பெயர் மாற்ற நடவடிக்கை மேற்கொள்ளப்பட்டுள்ளதாக கூறப்படும் நிலையில், திட்டத்தின் செயல்பாடுகள் தொடர்ந்து வழக்கம்போல நடைபெறும் என அதிகாரப்பூர்வ வட்டாரங்கள் தெரிவிக்கின்றன. இந்த மாற்றம் கல்வி மற்றும் அரசியல் வட்டாரங்களில் விவாதத்தை ஏற்படுத்தியுள்ளது.