திருச்சி காவிரி பாலம் அருகே ஏற்பட்ட சாலை விபத்தில் கணவர் பலி- மனைவி படுகாயம்…

திருச்சி மாவட்டம் லால்குடி அருகே உள்ள கீழவாளாடி பகுதியைச் சேர்ந்தவர் ஸ்டீபன்தாஸ் ( வயது 62). ரேஷன் கடையில் பணியாற்றி ஓய்வு பெற்றவர். இவரது மனைவி ஆக்னஸ்மேரி (47). இவர் ஸ்ரீரங்கம் பகுதியில் தூய்மை பணியாளராக பணியாற்றி வருகிறார். சம்பவத்தன்று காலை, கணவன்- மனைவி இருவரும் அரியமங்கலம் பகுதியில் இருந்து ஸ்ரீரங்கம் நோக்கி இருசக்கர வாகனத்தில் சென்று கொண்டிருந்தனர். அவர்கள் காவிரிப்பாலம் அருகே சென்றபோது அந்த வழியாக வந்த ஆட்டோ எதிர்பாராத விதமாக இரு சக்கர வாகனத்தின் மீது மோதியதாக தெரிகிறது. இதில், கணவன், மனைவி இருவரும் பலத்த காயமடைந்தனர். தகவலறிந்த திருச்சி மாநகர காவல்துறை தெற்கு போக்குவரத்து புலனாய்வு பிரிவு போலீசார், சம்பவ இடத்துக்குச் சென்று இருவரையும் மீட்டு சிகிச்சைக்காக அரசு மருத்துவமனையில் சேர்த்தனர். சிறிது நேரத்தில் ஸ்டீபன்தாஸ் சிகிச்சை பலனின்றி உயிரிழந்தார். ஆக்னஸ்மேரி ஆபத்தான நிலையில் சிகிச்சை பெற்று வருகிறார். இந்த விபத்து குறித்து தெற்கு போக்குவரத்து புலனாய்வு பிரிவு போலீசார் வழக்கு பதிவு செய்து விசாரித்து வருகின்றனர்.