திருச்சியில் பள்ளி மாணவர்களிடையே மோதல்: ஆசிரியருக்கு கத்திக்குத்து விழுந்ததால் பரபரப்பு…!

திருச்சி,  ஸ்ரீரங்கத்தில் அரசு உதவி பெறும் ஆண்கள் மேல்நிலைப்பள்ளி செயல்பட்டு வருகிறது.  இப்பள்ளியில் 1300 க்கு மேற்பட்ட மாணவர்களும்,  100-க்கும் மேற்பட்ட ஆசிரியர்களும் பணியாற்றி வருகின்றனர்.  இப்பள்ளியில் அவ்வப்போது மாணவர்களிடையே லேசான மோதல் ஏற்படும் என்று கூறப்படுகிறது.
இந்தநிலையில் இன்று(29-07-2024) மாலை 4 மணியளவில்  12-ம் வகுப்பு  அக்கவுண்டன்சி – சயின்ஸ் குரூப் மாணவர்களிடையே  திடீரென தகராறு ஏற்பட்டது.
அப்போது பிளஸ்-2 ஆசிரியர் சிவகுமார், மாணவர்களை சமாதானம் செய்ய முயன்றார்.  இதனால், ஆத்திரமடைந்த சயின்ஸ் குரூப் மாணவன் ஹரி சங்கர் தனது இடுப்பில் மறைத்து வைத்திருந்த கத்தியால்  எதிர் தரப்பு மாணவன் அன்புமணி மற்றும் ஆசிரியர் சிவக்குமாரை குத்தினான்.  இதில், அன்புமணிக்கு கையில் காயம் ஏற்பட்டது. ஆசிரியர்  சிவகுமாருக்கு தலையில் பலத்த காயம் ஏற்பட்டது.  இதுகுறித்து தகவல் அறிந்த ஸ்ரீரங்கம் போலீசார் சம்பவ இடத்திற்கு விரைந்து வந்து காயம் அடைந்த மாணவன் மற்றும் ஆசிரியரை ஸ்ரீரங்கம் அரசு மருத்துவமனையில் சிகிச்சைக்காக அனுமதித்தனர்.  மேலும்,  இச்சம்பவம் குறித்து வழக்கு பதிவு செய்து தீவிர விசாரணை மேற்கொண்டு வருகின்றனர்.  பள்ளி மாணவன் ஒருவன்  ஆசிரியரை கத்தியால் குத்திய சம்பவம் திருச்சியில் பரபரப்பை ஏற்படுத்தி உள்ளது. இந்த சம்பவம் குறித்து மாவட்ட கல்வி அதிகாரி  சங்கர நாராயணனும் விசாரணை மேற்கொண்டு வருகிறார்.