திருச்சி தியேட்டரில் ஏற்பட்ட தகராறு கத்திக்குத்தில் முடிந்தது: ஐந்து பேர் கைது…!

திருச்சி கோட்டை ஸ்டேஷன் அருகே உள்ள தியேட்டரில் திருச்சி உறையூர் அச்சடிகார தெருவை சேர்ந்த ரியாஸ் அகமது ( 22) மற்றும் அவரது நண்பர்களான முகின், முகமது சித்திக், முகமது இஜாஸ், அபு ஆகியோர் சினிமா பார்த்துக் கொண்டிருந்தனர். அதேபோல, அரியமங்கலம் சாமிநாதன் தெருவை சேர்ந்த முகமது கைப் (19) மற்றும் அவரது நண்பர்களான தனுஷ், அபிஷேக், தயாளன் ஆகியோரும் சினிமா பார்த்துக் கொண்டிருந்தனர். ​​ அப்போது இருதரப்பினரும் கூச்சல் எழுப்பிக் கொண்டே இருந்துள்ளனர்.  இதுதொடர்பாக  இரு தரப்பினருக்கும் இடையே தகராறு ஏற்பட்டுள்ளது. பின்னர் படம் முடிந்து  அவர்கள் தனித்தனியாக வெளியே சென்றனர்.  ஆனால், அரிய மங்கலத்தை சேர்ந்தவர்கள் அவர்களை பின் தொடர்ந்து சென்று உறையூர் பங்காளி தெருவில் உள்ள ஆரம்ப சுகாதார நிலையம் முன்பு அவர்களை தகாத வார்த்தைகளால் திட்டி தாக்க முயன்றனர்.  அப்போது அவர்களுக்கிடையே மீண்டும் தகராறு ஏற்பட்டது. இதில், அபிஷேக்கின் உள்ளங்கையில் கத்திகுத்து விழுந்தது. அவர், சிகிச்சைக்காக திருச்சி அரசு மருத்துவமனையில் சேர்க்கப்பட்டுள்ளார்.  இதுகுறித்து இருதரப்பினரும் உறையூர் போலீசில் புகார் அளித்தனர். இதுகுறித்து போலீசார் வழக்கு பதிந்து இருதரப்பைச் சேர்ந்த ஐந்து பேரை கைது செய்து விசாரணை நடத்தி வருகின்றனர்.