ஜூலை 16 முதல் திருச்சி பஞ்சப்பூர் பேருந்து நிலையம் பயன்பாட்டுக்கு வரும்:போக்குவரத்தில் என்னென்ன மாற்றம்?- தெளிவுபடுத்தினார் மாவட்ட கலெக்டர் சரவணன்…

திருச்சி மாநகரில் நிலவும் போக்குவரத்து நெருக்கடியை கருத்தில் கொண்டு திருச்சி, பஞ்சப்பூரில் ஒருங்கிணைந்த பேருந்து நிலையம் கட்டப்பட்டுள்ளது. இதனை தமிழ்நாடு முதலமைச்சர் மு.க.ஸ்டாலின் ஏற்கனவே திறந்து வைத்துள்ளார். பேருந்துகள் புறப்படும் நேரம் மற்றும் கடைகள் ஏலம் உள்ளிட்டவை காரணமாக இந்த பேருந்து நிலையம் பயன்பாட்டுக்கு வராமல் இருந்தது. இந்தநிலையில் ஜூலை 16ம் தேதி இந்த பேருந்து நிலையம் பயன்பாட்டுக்கு வரும் என்று அமைச்சர் கே.என்.நேரு ஏற்கனவே அறிவித்துள்ளார். இந்நிலையில் திருச்சி மாவட்ட ஆட்சியர் அலுவலகத்தில் கலெக்டர் வே.சரவணன் இன்று( ஜூலை 14) செய்தியாளர்களிடம் கூறுகையில், திருச்சி- பஞ்சப்பூர் பேருந்து நிலையத்திலிருந்து வருகிற 16-ந் தேதி முதல் அனைத்து பேருந்துகளும் இயங்கும். மத்திய பேருந்து நிலையத்திலிருந்து புறநகர் பேருந்துகள் இயங்காது. நகர பேருந்துகள் மட்டும் இயங்கும். சத்திரம் பேருந்து நிலையத்தில் இருந்து கடலூர், பெரம்பலூர், அரியலூர் பேருந்துகள் வழக்கம் போல் இயங்கும். ஆமினி பேருந்துகள் பஞ்சப்பூர் பகுதியில் தற்போதைக்கு அவர்களுக்கு ஒதுக்கப்பட்ட இடங்களில் இருந்து பயணிகளை ஏற்றி இறக்கி செல்லலாம். மத்திய பேருந்து நிலைய வெளிப்புறம் அவர்கள் வந்து செல்ல அனுமதி உண்டு. பஞ்சப்பூர் பேருந்து நிலையத்தில் 20 தேநீர் கடை,12 உணவகம்,10 ஸ்நாக்ஸ் ஷாப் அமைக்கப்பட்டுள்ளது. புதிய பேருந்து நிலையத்தில் நிரந்தர காவல் நிலையம் அமைக்க தமிழ்நாடு அரசிடம் அனுமதி கேட்கப்பட்டுள்ளது. பஞ்சப்பூர் பேருந்து நிலையத்திலிருந்து மத்திய பேருந்து நிலையத்திற்கு நகர பேருந்துகள் இயக்கப்படும். வழக்கம்போல் சத்திரம் பேருந்து நிலையத்திலிருந்து இயக்கப்படும் நகரப் பேருந்துகளும் இயங்கும். இவ்வாறு அவர் கூறினார். பேட்டியின்போது போலீஸ் கமிஷனர் காமினி, மாநகராட்சி ஆணையர் மதுபாலன் ஆகியோர் உடன் இருந்தனர்.