நிலம் விற்றதில் பணத்தகராறு: தங்கையை அரிவாளால் வெட்டிய அண்ணனுக்கு வலை…! * பாஜக முன்னாள் நிர்வாகி கைது

கரூர் செங்குந்தபுரம் 5-வது குறுக்கு தெருவைச் சேர்ந்தவர் கோபிநாத் ( வயது 47). பாஜக மாநில இளைஞரணி முன்னாள் செயலாளர் மற்றும் மாவட்ட பொது செயலாளர் பொறுப்பு வகித்தவர். இவரது தங்கை சுமிதா (44). இவரது கணவர் சரவணன். இவர்கள் கரூர் தெற்கு காந்திகிராமம் இந்திரா நகரில் வசித்து வருகின்றனர். கோபிநாத்தும், சரவணனும் சேர்ந்து கரூர் செம்மடை பகுதியில் 50 சென்ட் நிலம் வாங்கியுள்ளனர்.
இதனை விற்பனை செய்த நிலையில், சரவணனுக்கான பங்கு தொகையை கோபிநாத் கொடுக்கவில்லை எனக் கூறப்படுகிறது. இது தொடர்பாக ஜூன் 9-ம் தேதி இரவு 8 மணிக்கு செங்குந்தபுரத்தில் உள்ள கோபிநாத் அலுவலகத்திற்கு சுமிதா சென்று தங்களுக்கான
பங்கு தொகையை கேட்டுள்ளார். அப்போது இருவரிடையே தகராறு ஏற்பட்டுள்ளது. அப்போது அங்கிருந்த பாஜக கரூர் மத்திய மாநகர முன்னாள் தலைவர் கார்த்திகேயன் (44) கோபிநாத்துக்கு ஆதரவாக பேசியுள்ளார். அப்போது தங்கை மீது ஆத்திரமடைந்த கோபிநாத் அவரை அரிவாளால் வெட்டியதோடு கொலை மிரட்டல் விடுத்துள்ளார். இதில் காயமடைந்த சுமிதா கரூர் அரசு மருத்துவக் கல்லூரி மருத்துவமனையில் சிகிச்சை பெற்று வருகிறார். இதுகுறித்து கரூர் நகர போலீஸில் சுமிதா அளித்த புகாரின்பேரில் கோபிநாத், கார்த்திகேயன் ஆகிய இருவர் மீது ஆபாசமாக திட்டி, ஆயுதத்தால் தாக்கி, கொலை மிரட்டல் விடுத்தது, பெண் வன்கொடுமை உள்ளிட்ட 5 பிரிவுகளின் கீழ் வழக்கு பதிவு
செய்து பாஜக முன்னாள் நிர்வாகி கார்த்திகேயனை கைது செய்து கரூர் நீதிமன்றத்தில் ஆஜர்படுத்தி சிறையில் அடைத்தனர். தலைமறைவான கோபிநாத்தை தேடி வருகின்றனர்.