ஹெல்மெட், சீட் பெல்ட் அணியாவிட்டால் இனி “ஆட்டோமேட்டிக் பைன்” விழும்- திருச்சி மாநகரில் 29 இடங்களில் அதிநவீன தானியங்கி கேமராக்கள் பொருத்தம்…!

திருச்சி மாநகரில் போக்குவரத்து விதி மீறல்களைக் கட்டுப்படுத்த மாநகரக் காவல் துறை சார்பில் பல்வேறு நடவடிக்கைகள் மேற்கொள்ளப்பட்டு வருகின்றன. இந்நிலையில், மாநகரில் உள்ள 9 சோதனைச் சாவடிகளில் இருசக்கர வாகனங்களில் ஹெல்மெட் அணியாமல் செல்லும் வாகனங்களை படம் பிடித்து வழக்குப் பதிவு செய்யும் விதமாக 21 தானியங்கி அதிநவீன கேமராக்கள் பொருத்தப்பட்டுள்ளன. இதேபோல, கார்களில் சீட்பெல்ட் அணியாமல் செல்பவர்களின் வாகனங்களைப் படம் பிடித்து வழக்குப் பதிவு செய்யும் விதமாக கருமண்டபம், பஞ்சப்பூர், ஜங்சன், அரியமங்கலம், கோட்டை உள்பட 6 இடங்களில் அதிநவீன தானியங்கி கேமராக்கள் பொருத்தப்பட்டுள்ளன. மேலும், மேலபுலிவார் ரோடு, ராமகிருஷ்ணா பாலம் ஆகிய இரண்டு இடங்களில் ஒருவழிப் பாதையில் செல்வோரின் வாகனங்களைப் படம் பிடித்து வழக்குப் பதிவு செய்யும் விதமாக நவீன தானியங்கி கண்காணிப்பு கேமராக்கள் பொருத்தப்பட்டுள்ளன.
மாநகரில் பொருத்தப்பட்டுள்ள இந்த 29 நவீன கேமராக்கள் செயல்பாட்டை மாநகர நவீன காவல் கட்டுப்பாட்டு அறையில் இருந்து மாநகரக் காவல் ஆணையர் ந.காமினி தொடங்கி வைத்தார். இந்த நவீன கேமராக்கள் அனைத்தும் சிறப்பு மென்பொருள் மூலம் இணைக்கப்பட்டுள்ளதால், நவீன கட்டுப்பாட்டு அறையில் இருந்து நேரடியாகக் கண்காணித்து விதிமீறல்களில் ஈடுபடும் வாகன ஓட்டிகள் மீது நடவடிக்கை எடுக்க முடியும் என்று காவல் துறையினர் தெரிவித்தனர்.