Rock Fort Times
Online News

திருச்சியில் தாறுமாறாக ஓடிய கார் மோதியதில் 5 பேர் படுகாயம்: விபத்தை ஏற்படுத்திய நபரை சிறையில் அடைக்கக்கோரி சாலை மறியல்…! (வீடியோ இணைப்பு)

திருச்சி, கொடாப்பு பகுதியை சேர்ந்தவர் முருகானந்தம் (34).இவர் சம்பவத்தன்று இரவு தனது நண்பர்களுடன் மது அருந்தி விட்டு வயலூர் சாலையில் காரை வேகமாக ஓட்டிச் சென்றார்.அந்த கார் சீனிவாசா நகர் பகுதியில் சென்று கொண்டிருந்த போது எதிரே வந்த இருசக்கர வாகனத்தின் மீது மோதியது. மது போதையில் இதனை அறியாத முருகானந்தம் சுமார் 200 மீட்டர் தூரம் இருசக்கர வாகனத்தை மோதி தள்ளிக் கொண்டே சென்றார். இதனைக் கண்ட அப்பகுதி மக்கள் கூச்சலிடவே விபரீதத்தை உணர்ந்த முருகானந்தம் உடனே காரை நிறுத்திவிட்டு தனது நண்பர்களுடன் தப்பி ஓடிவிட்டார். இந்த விபத்தில் சிசிக்கந்தர்க்கந்தர் (38), ரசியா பானு (36), உமர் ( 5), சபிகா (11), உமையரா (15) ஆகிய 5 பேர் படுகாயம மடைந்தனர். அவர்களை மீட்ட அப்பகுதியினர் சிகிச்சைக்காக மருத்துவமனைக்கு அனுப்பி வைத்தனர்.விபத்து ஏற்படுத்திய காரை பறிமுதல் செய்த போலீசார், விபத்து ஏற்படுத்திய முருகானந்தம் மீது 3 பிரிவுகளின் வழக்கு பதிவு செய்தனர்.ஆனால், முருகானந்தம் மீது பதிவு செய்யப்பட்ட வழக்கு உரிய குற்றத்திற்கான வழக்காக இல்லாமல் எளிதாக ஜாமீன் கிடைக்கும் வழக்காக போலீசார் பதிவு செய்துள்ளனர்.அதனால், முருகானந்தத்திற்கு உடனடியாக ஜாமீன் கிடைத்தது. முருகானந்தத்தை காப்பாற்றும் நோக்கிலேயே போலீசார் உரிய வழக்கு பதிவு செய்யவில்லை என குற்றம் சாட்டியும், விபத்து ஏற்படுத்திய முருகானந்தம் மீது முறையாக வழக்கு பதிவு செய்து அவரை சிறையில் அடைக்க வேண்டும் என வலியுறுத்தியும் விபத்தில் காயமடைந்தவர்களின் உறவினர்கள் திருச்சி அரசு மருத்துவமனை முன்பு அமர்ந்து மறியல் போராட்டத்தில் ஈடுபட்டனர். அவர்களிடம் போலீசார் பேச்சுவார்த்த நடத்தி இதுகுறித்து உரிய நடவடிக்கை எடுக்கப்படும் என தெரிவித்ததன் பேரில் அனைவரும் கலைந்து சென்றனர்.

Comments are closed.

Rockfort Times செய்திகளை உடனுக்குடன் அறிந்து கொள்ள வேண்டுமா? இல்லை ஆம்