சேலம் மாநகராட்சி கூட்டத்தில் ரகளை: அதிமுக- திமுக கவுன்சிலர்கள் 13 பேர் மீது வழக்கு…! (வீடியோ இணைப்பு)

சேலம் மாநகராட்சியின் மாமன்ற மாதாந்திர கூட்டம் மேயர் ராமச்சந்திரன் தலைமையில் அண்மையில் நடைபெற்றது. இந்த கூட்டத்தில் மாமன்ற உறுப்பினர்கள் தங்கள் கோட்டத்தின் பல்வேறு கோரிக்கைகளை எடுத்துரைத்தனர். அப்போது அ.தி.மு.க. மாமன்றக் குழு தலைவரும், கவுன்சிலருமான யாதவ மூர்த்தி எழுந்து பேச முயன்றார். அந்த நேரத்தில் தி.மு.க., கவுன்சிலரான சுகாசினி குறுக்கிட்டார். இதனால் இரு தரப்பினர் இடையே வாக்குவாதம் ஏற்பட்டது. இதனால் ஆத்திரமடைந்த கவுன்சிலர் சுகாசினி, யாதவ் மூர்த்தியின் கன்னத்தில் அறைந்ததால் பரபரப்பு ஏற்பட்டது. மற்ற உறுப்பினர்கள் அவர்களை சமாதானப்படுத்த முயற்சி மேற்கொண்டனர். இதனால் கூட்டத்தில் சலசலப்பும், கைகலப்பும் ஏற்பட்டது. இதனையடுத்து அதிமுக கவுன்சிலர்கள் திடீரென மேயர் மேஜை முன்பாக அமர்ந்து தர்ணா போராட்டத்தில் ஈடுபட்டனர். மாநகராட்சி டெண்டர்களை அமைச்சருக்கு நெருக்கமானவர்கள் மட்டுமே எடுப்பதாக கவுன்சிலர் யாதவமூர்த்தி குற்றம் சாட்டிய நிலையில் திமுக கவுன்சிலர்கள் அவரை சுற்றி வளைத்து கேள்வி எழுப்பியபோது இந்த ரகளை ஏற்பட்டதாக கூறப்படுகிறது. திமுக, அதிமுக கவுன்சிலர்களுக்கு இடையே ஏற்பட்ட இந்த மோதல் காரணமாக கூட்டத்தை பாதியிலேயே முடித்துவிட்டு மேயர் ராமச்சந்திரன், ஆணையாளர் இளங்கோவன் கூட்ட அரங்கை விட்டு வெளியேறினர். இந்தநிலையில் நடந்த சம்பவம் குறித்து இரு தரப்பினரும் போலீசில் புகார் அளித்துள்ளனர். அதிமுகவினர் அளித்த புகாரின் பேரில் 8 கவுன்சிலர்கள் மீதும், திமுகவினர் கொடுத்த புகாரின் பேரில் 5 கவுன்சிலர்கள் மீதும் வழக்குப்பதிவு செய்யப்பட்டு உள்ளது. தாக்குதல், தகாத வார்த்தைகளால் திட்டுதல், பெண்களிடம் இழிவாக நடந்து கொள்ளுதல் உள்ளிட்ட 4 பிரிவுகளில் வழக்குப்பதிவு செய்யப்பட்டு உள்ளது. இது தொடர்பாக போலீசார் தொடர்ந்து விசாரணை நடத்தி வருகின்றனர்.