கோடை விடுமுறை முடிந்து ஜூன் 2-ம் தேதி பள்ளிகள் திறப்பு: தனியார் பள்ளி வாகனங்களின் தரம் குறித்து ஆய்வு…!

கோடை விடுமுறை முடிந்து தமிழகமெங்கும் ஜூன் 2-ம் தேதி பள்ளிகள் திறக்கப்பட உள்ளது. முன்னதாக பள்ளியையும், வகுப்பறைகளையும்
தூய்மை படுத்துவது உள்ளிட்ட சில வழிகாட்டு நெறிமுறைகளை பள்ளி கல்வித்துறை அறிவுறுத்தி உள்ளது. மேலும், தனியார் பள்ளி வாகனங்களின் தரம் குறித்தும் ஆய்வு மேற்கொள்ள உத்தரவிட்டிருந்தது. அதன்படி இன்று( மே 28) தனியார் பள்ளி வாகனங்களின் தரம் குறித்து திருச்சி மாவட்ட கலெக்டர் பிரதீப்குமார் ஆய்வு மேற்கொண்டார். இந்த ஆய்வின் போது லால்குடி கோட்டாட்சியர் சிவசுப்பிரமணியன்,
வட்டாரப் போக்குவரத்து அலுவலர்கள் சுரேஷ் பாபு, தா. நடராஜன், போக்குவரத்து வாகன ஆய்வாளர்கள் சா.செந்தில்குமார், சு.செந்தில், பா.அருண்குமார் அ.முகமது மீரான், தனியார் பள்ளி வாகனங்களின் ஓட்டுநர்கள், தீயணைப்பு மற்றும் மீட்பு பணித்துறை அலுவலர்கள் உள்ளிட்ட பலர் உடன் இருந்தனர்.