சொத்து குவிப்பு வழக்கில் சிக்கிய திருச்சி உணவு பாதுகாப்பு அதிகாரி காஞ்சிபுரத்துக்கு தூக்கியடிப்பு…!

அளவுக்கு அதிகமாக சொத்து சேர்த்ததாக வழக்கு பதிவு செய்யப்பட்ட உணவு பாதுகாப்பு நியமன அலுவலர் காஞ்சிபுரத்துக்கு பணியிட மாற்றம் செய்யப்பட்டுள்ளார். திருச்சி மாவட்ட உணவு பாதுகாப்பு நியமன அலுவலராக ரமேஷ்பாபு என்பவர் கடந்த 4 ஆண்டுகளாக பணியாற்றி வந்தார். அவர் வருமானத்திற்கு அதிகமாக சொத்து சேர்த்ததாக கடந்த சில தினங்களுக்கு முன்பு அவர் மீது லஞ்ச ஒழிப்புத்துறை போலீசார் வழக்கு பதிவு செய்தனர். தொடர்ந்து அவர் அந்த பதவியில் நீடித்து வந்த நிலையில் தற்போது அவரை காஞ்சிபுரம் மாவட்டத்திற்கு
பணியிட மாற்றம் (டிரான்ஸ்பர்) செய்து தமிழக அரசு உத்தரவிட்டுள்ளது திருச்சி மாவட்ட உணவு பாதுகாப்புத்துறை நியமன அலுவலராக அன்புசெல்வன் என்பவர் நியமிக்கப்பட்டுள்ளார்.