திருச்சியில் இருந்து கொச்சிக்கு ரூ.4 ஆயிரம் கட்டணத்தில் விமானத்தில் பறக்கலாம்…* மே 7-ம் தேதி முதல் மீண்டும் சேவை தொடக்கம்!

திருச்சியில் இருந்து சிங்கப்பூர், மலேசியா, இலங்கை, துபாய் உள்ளிட்ட வெளிநாடுகளுக்கு விமானங்கள் இயக்கப்படுகின்றன.அதேபோல சென்னை, பெங்களூரு, மும்பை, ஹைதராபாத், உள்ளிட்ட உள்நாடுகளுக்கும் விமான சேவை உள்ளது. திருச்சி -கொச்சி இடையிலான விமான சேவையை இண்டிகோ ஏர்லைன்ஸ் நிறுவனம், 2018-ம் ஆண்டு திருச்சியில் இருந்து துவங்கியது. ஆனால், பல்வேறு சிக்கல்கள் மற்றும் நிர்வாக காரணங்களால் சில மாதங்களிலேயே இந்த சேவை நிறுத்தப்பட்டது. இந்த மார்க்கத்தில் விமானங்களை இயக்க வேண்டும் என பயணிகள் தொடர்ந்து கோரிக்கை விடுத்து வந்தனர். அதனை த்தொடர்ந்து, மே 7 முதல், ஏர் இந்தியா எக்ஸ்பிரஸ் நிறுவனம், திருச்சி – கொச்சி இடையே தினசரி விமான சேவையை துவங்க உள்ளது. திருச்சியில் இருந்து தினமும் பகல் 12 மணிக்கு புறப்படும் விமானம், மதியம் 1 மணிக்கு கொச்சி சென்றடையும். கொச்சியில் இருந்து மதியம் 1-40க்கு புறப்படும் விமானம், மதியம் 2-40 மணிக்கு திருச்சி வந்தடையும். இதற்கான விமான கட்டணம் 4,000 ரூபாயில் இருந்து துவங்குகிறது. மேலும், விவரங்களை airindiaexpress.com என்ற இணையதளத்தில் தெரிந்து கொள்ளலாம் என்று அந்த நிறுவனம் சார்பில் கேட்டுக் கொள்ளப்பட்டுள்ளது.