முசிறி அருகே குடும்பத்தகராறில் வாலிபர் வெட்டிக்கொலை: பெரியப்பா உட்பட 2 பேர் கைது…!

திருச்சி மாவட்டம், முசிறி அருகே உள்ள மங்களம் மல்லிகை நகர் பகுதியை சேர்ந்தவர் செல்வராஜ். இவரது மனைவி செல்வி. செல்வராஜ் கடந்த  2 ஆண்டுக்கு முன்பு இறந்து விட்டார். செல்வி தனது மகன் பிரதீப்(19), மகள் நிசாந்தினி ஆகியோருடன் வசித்து வருகிறார். பிரதீப் லாரி கிளீனராக வேலை பார்த்து வந்துள்ளார். வெளியூரில் வேலை பார்த்த பிரதீப் திருவிழாவிற்காக கடந்த 3 நாட்களுக்கு முன்பாக சொந்த ஊருக்கு வந்திருந்தார். செல்வராஜின் அண்ணன் பாஸ்கர் என்கிற பொறைக்கலான். இவர் செல்வியின் இடத்தில் வீடு கட்டி வசித்து வந்தார். இந்நிலையில் பிரதீப், தனது பெரியப்பாவிடம் எப்போது வீட்டை காலி செய்வீர்கள் என்று கேட்டுள்ளார். அப்போது இருவருக்கும் இடையே தகராறு ஏற்பட்டதாக கூறப்படுகிறது. அப்போது பாஸ்கர் வீட்டில் இருந்த அரிவாளை எடுத்து வந்து பிரதீப்பின் தலையில் வெட்டினார். பாஸ்கரின் மகன் 16 வயது சிறுவன் கத்தியால் பிரதீப்பை மார்பில் குத்தினார். இதில் ரத்த வெள்ளத்தில் கீழே சரிந்த பிரதீப் சம்பவ இடத்திலேயே உயிரிழந்தார். இதுகுறித்து தகவல் அறிந்த ஜெம்புநாதபுரம் போலீசார் சம்பவ இடத்திற்கு விரைந்து சென்று பிரதீப் உடலை கைப்பற்றி பிரேத பரிசோதனைக்காக முசிறி அரசு மருத்துவமனைக்கு அனுப்பி வைத்தனர். இதுகுறித்து ஜெம்புநாதபுரம் காவல் நிலையத்தில் செல்வி கொடுத்த புகாரின்பேரில்
போலீசார் கொலை வழக்கு பதிந்து பாஸ்கர் மற்றும் அவரது மகன் ஆகிய இருவரையும் கைது செய்தனர். இந்த கொலை சம்பவம் அப்பகுதி மக்களிடையே பரபரப்பை ஏற்படுத்தி உள்ளது.