திருச்சியில் மனைவி, மகளுக்கு அரிவாள் வெட்டு- கணவன் கைது

திருச்சி விமான நிலையம் காந்திநகர் பள்ளிவாசல் தெரு பகுதியைச் சேர்ந்தவர் சுரேஷ் (வயது 41.) இவரது மனைவி கோமதி (40). இருவரும் காதல் திருமணம் செய்து கொண்டவர்கள். இந்த தம்பதியருக்கு 3 குழந்தைகள் உள்ளனர். கோமதி திருச்சி கே.கே.நகர் பகுதியில் பூக்கடை நடத்தி வருகிறார். குடிப்பழக்கம் உடைய சுரேஷ் அடிக்கடி மது குடித்து விட்டு வந்து மனைவி, குழந்தைகளிடம் தகராறு செய்து வந்துள்ளார் . வழக்கம்போல சம்பவத்தன்று குடிபோதையில் வீட்டுக்கு வந்த சுரேஷ், மனைவியிடம் தகராறு செய்ததோடு அரிவாளால் வெட்டினார். இதனை தடுக்கச் சென்ற மகள் ஸ்ரீவர்த்தினிக்கும் வெட்டு விழுந்தது. இதில் காயமடைந்த அவர்கள் இருவரையும் அருகில் இருந்தவர்கள் மீட்டு சிகிச்சைக்காக திருச்சி அரசு மருத்துவமனையில் சேர்த்தனர். இதுகுறித்து கோமதி கொடுத்த புகாரின் பேரில் ஏர்போர்ட் போலீசார் சுரேஷ் மீது வழக்குபதிவு செய்து அவரை கைது செய்து சிறையில் அடைத்தனர்