அரசு தேர்வுகள் 2024 : டிஎன்பிஎஸ்சி அட்டவணை வெளியீடு ..

டிஎன்பிஎஸ்சி 2024 வருடாந்திர தேர்வு கால அட்டவணை இன்று வெளியாகி உள்ளது . தமிழ்நாடு அரசின் பல்வேறு துறைகளுக்கு தேவைப்படும் ஊழியர்கள் மற்றும் அலுவலர்கள் தமிழ்நாடு அரசு பணியாளர் தேர்வாணையம் மூலமாக தேர்வு நடத்தப்பட்டு நியமனம் செய்யப்படுகிறார்கள். இந்த தேர்வுகளுக்கான வருடாந்திர அட்டவணை டிசம்பர் மாதத்தில் வெளியிடப்படுவது வழக்கம். அதன்படி 2024 ஆம் ஆண்டுக்கான தேர்வு கால அட்டவணை டிசம்பர் 15ஆம் தேதி வெளியாகும் என டிஎன்பிஎஸ்சி அறிவித்தது. ஆனால் 15 ஆம் தேதி கடந்தும் தேர்வு கால அட்டவணை குறித்து எந்தவித தகவலும் வராத நிலையில் இன்று ( 20.12.2023 ) வருடாந்திர தேர்வு கால அட்டவணையை டிஎன்பிஎஸ்சி நிர்வாகம் வெளியிட்டுள்ளது.

மொத்தம் 19 தேர்வுகள் அறிவிக்கப்பட்டுள்ள நிலையில் ,குரூப் 4 தேர்வு குறித்து ஜனவரி மாதம் அறிவிப்பு வெளியாகும் என்று தெரிவிக்கப்பட்டுள்ளது.இதற்கான எழுத்து தேர்வு ஜூன் மாதம்   நடைபெற உள்ளது. எனினும் தேவைப்படும் காலி பணியிடங்கள் குறித்து குறிப்பிடப்படவில்லை. குரூப் 1 தேர்வுக்கு மார்ச் மாதம் அறிவிப்பு வெளியாக உள்ள நிலையில், ஜூலை மாதம் 65 பணியிடங்களுக்காக தேர்வு நடைபெற உள்ளதாக தெரிவிக்கப்பட்டுள்ளது அதிகபட்சமாக 1294 காலியிடங்களுக்கு குரூப் 2,  2ஏ தேர்வு நடத்தப்பட உள்ளது. அதற்கான அறிவிப்பு 2024 ஆம் ஆண்டு மே மாதம் வெளியாகி  எழுத்து தேர்வுகள் ஆகஸ்ட் மாதம்  நடைபெற உள்ளன.

அதேபோல முதன்முறையாக தமிழ்நாடு வனத்துறை சார்பில் ஃபாரஸ்ட் கார்டு மற்றும் ஃபாரஸ்ட் வாட்ச்சா்  பணிகளுக்கு தேர்வு நடத்தப்பட உள்ளது. இதற்காக 1264 காலி பணியிடங்கள் ஒதுக்கப்பட்டுள்ளன. தேர்வு அறிவிப்பு 2024 மார்ச் மாதம் வெளியாகி ஜூன் மாதத்தில் எழுத்து தேர்வு நடைபெற உள்ளது. இது மட்டுமின்றி நீதிபதிகள் வனத்துறை அலுவலர்கள் , ஒருங்கிணைந்த பொறியியல் துறை சேவை , உடற்கல்வி , நூலக அலுவலர்கள்,  தொல்லியல் துறை அதிகாரி உள்ளிட்ட பல்வேறு பணியிடங்களுக்கான தேர்வு அடுத்த ஆண்டு நடைபெற உள்ளதாக தெரிவிக்கப்பட்டுள்ளது.