அநாகரீகமாக பேசும் தி.மு.க.வினரை மு.க.ஸ்டாலின் கண்டிக்க வேண்டும்… -திருமாவளவன்…!

மதுரை, அவனியாபுரத்தில் செய்தியாளர்களை சந்தித்த வி.சி.க தலைவர் திருமாவளவன், பட்டினப்பாக்கம் மக்கள் ஒப்புதல் இல்லாமல் தமிழ்நாடு அரசால் புதிய தலைமைச் செயலகத்தை கட்ட முடியாது. பரந்தூர் விமான நிலையத் திட்டமும் அப்படிதான். அதேபோன்று, பட்டினப்பாக்கத்தில் 27 ஏக்கரில் புதிய தலைமைச் செயலகம் அமைக்கும் பணிக்கு அப்பகுதி மக்கள் இசைவு கொடுத்தால் மட்டுமே செயல்படுத்த முடியும் என்று கூறினார். முதல்வரின் வெளிநாட்டுப் பயணம் குறித்த விமர்சனங்கள் தொடர்பாக பேசிய அவர், முதல்வரின் வெளிநாட்டுப் பயணம் முழுமையாக முடிவடையவில்லை. தனது பயணத்தை முழுமையாக முடித்துவிட்டு முதல்வர் வரும்போதுதான் கருத்து கூற முடியும் என்றார். இடைத்தேர்தல் குறித்து செய்தியாளர்களின் கேள்விக்கு பதிலளித்த திருமாவளவன், “மதசார்பற்ற சமூகநீதி வெற்றிக் கூட்டணியின் வேட்பாளர்களின் வெற்றிக்கு விடுதலைச் சிறுத்தைகள் கட்சி பங்காற்றும். தொடக்கத்திலிருந்தே இடதுசாரிக் கட்சிகள் ஆட்சிக்கு மட்டுமே ஆதரவு, நாங்கள் இணைந்தே பணியாற்றுவோம் எனத் தெளிவுபடுத்தியுள்ளார்கள். ஆட்சிக்கு ஆதரவு என்பதில் ஐயமில்லை, ஆனால், இடைத்தேர்தலில் தனித்துப் போட்டியிடுகிறோம் எனத் தெரிவித்துள்ளார்கள். அது அவர்களுக்கான சுதந்திரம், உரிமை. அவர்கள் போட்டியிடுவதால் கூட்டணிக்கு பாதிப்பை ஏற்படுத்தாது. சமீபத்தில் திமுக சார்பில் நடைபெற்ற கண்டன ஆர்ப்பாட்டத்தில் அமைச்சர் நிர்மல் குமாரை பற்றி பேசும் போது மக்களவை உறுப்பினர் ஆர்.ராசா தாயை பழிக்கும் வகையில் மிக இழிவான சொற்களால் வசைப்பாடி இருப்பது அதிர்ச்சி அளிக்கிறது. இதை வி.சி.க. கண்டிக்கிறது. பக்குவப்படுத்தப்பட்ட ஒரு இயக்கத்தை சார்ந்த இன்றைய தலைவர்கள் இவ்வளவு கொச்சையான வார்த்தைகளால் அரசியல் எதிரிகளை விமர்சிப்பது என்பது கவலை அளிக்கிறது. முன்னாள் முதலமைச்சர் ஸ்டாலின், தி.மு.க-வில் இப்படி பேசக் கூடியவர்களை வெளிப்படையாக கண்டிக்க வேண்டும்” என்றார்.