ரோட்டரி கிளப் திருச்சி நெக்ஸ்ட் ஜென் புதிய நிர்வாகிகள் பதவி ஏற்பு விழா…!

ரோட்டரி கிளப் ஆப் திருச்சி நெக்ஸ்ட் ஜென் சார்பாக இரண்டாம் ஆண்டு புதிய நிர்வாகிகள் பதவியேற்பு மற்றும் புதிய உறுப்பினர்கள் அறிமுக விழா திருச்சியில் உள்ள ஜென்னி பிளாசா வளூர் ஹாலில் நடைபெற்றது.  இதில், புதிய தலைவராக அப்துல் ரஹீம், செயலாளராக பிரபு, பொருளாளராக கோபி கிருஷ்ணன் ஆகியோர் பதவியேற்றனர். அவர்களுக்கு ரோட்டரி ஆளுநர் (2026-2027) ஆர்.பி.எஸ்.மணி பதவிப் பிரமாணம் செய்து வைத்தார். அப்போது அவர் பேசுகையில், ரோட்டரி, மக்களுக்கு என்னவெல்லாம் சேவை செய்கிறது எவ்வாறு செய்கிறது என்பதையும், போலியோ இல்லா உலகத்தை ரோட்டரி உருவாக்கியதையும், அது உருவாக பாடுபட்டதையும் மற்றும் ரோட்டரியின் கனவு திட்டமான சிறப்பு குழந்தைகளுக்கான நிகழ்ச்சி, பள்ளி கல்லூரிகளுக்கான விழிப்புணர்வு நிகழ்ச்சி, குழந்தைகள், பெண்களுக்கு எதிரான வன்கொடுமை குறித்த விழிப்புணர்வு நிகழ்ச்சி, இன்றைய இளைஞர்கள் மது போதை உள்ளிட்ட தவறான வழியில் செல்லாமல் இருக்க அவர்களுக்கு வழங்க வேண்டிய அறிவுரைகள் குறித்து விவரித்தார். சிறப்பு அழைப்பாளராக முன்னாள் ஆளுநர் ஆனந்த ஜோதி கலந்து கொண்டு, ரோட்டரியின் முக்கியத்துவம், ரோட்டரி செயல்பாடுகள், சேவைகள் குறித்தும், அதில் நம்முடைய பங்கு எவ்வாறு இருக்க வேண்டும் என்பதையும் விளக்கி கூறினார். சங்க ஆலோசகர் சுபாபிரபு, ரோட்டரி கிளப் திருச்சி நெக்ஸ்ட் ஜென் உருவான விதம், ஆற்றும் நற் செயல்களையும் எடுத்துரைத்தார். மண்டல ஆளுநர் ஹேமலதா, ரோட்டரியின் பயன்பாடுகள் அதில் சங்கங்கள் செயல்படுத்த வேண்டிய நிகழ்ச்சிகள் சம்பந்தமாக எடுத்துரைத்தார். துணை ஆளுநர் கிருபாகரன், சங்கம் எவ்வாறு மக்களுக்கு செயலாற்ற வேண்டும், அதன் திட்டங்களை விளக்கிக் கூறினார். புதிய தலைவர் அப்துல் ரஹீம், இந்த ஆண்டிற்கான வளர்ச்சி திட்டங்கள் குறித்தும், விழிப்புணர்வு நிகழ்ச்சிகள் குறித்தும், சாலை பாதுகாப்பு விழிப்புணர்வு, குழந்தைகள் மற்றும் பெண்களுக்கு எதிரான வன்கொடுமை சம்பந்தமான விழிப்புணர்வு, போதை விழிப்புணர்வு, ரத்த தானம் முகாம் உள்ளிட்ட பல்வேறு திட்டங்கள் குறித்து அறிக்கை வெளியிட்டார். இந்நிகழ்ச்சியில் மாவட்ட சேர்மன் முருகானந்தம், அப்பாஸ் மற்றும் பல்வேறு சங்கத் தலைவர்கள், செயலாளர்கள் கலந்து கொண்டு சிறப்பித்தார்கள்.