திருச்சி, பஞ்சப்பூர் புதிய பேருந்து நிலையத்தில் துணிகர சம்பவம்: கண்டக்டரின் பணப்பை திருட்டு…!

புதுக்கோட்டை மாவட்டம், அண்டக்குளம் கலிங்கராயன்பட்டி பகுதியைச் சேர்ந்தவர் முருகேசன். இவரது மகன் சந்தனகுமார் (வயது 22). இவர் திருச்சி- புதுக்கோட்டை மார்க்கத்தில் இயக்கப்படும் அரசு பேருந்தில் கண்டக்டராக பணியாற்றி வருகிறார். புதுக்கோட்டையில் இருந்து பஞ்சப்பூர் புதிய பேருந்து நிலையத்திற்கு பேருந்து வந்த நிலையில் சந்தனகுமார் தனது கைப்பையை ஓட்டுனரின் சைடு கண்ணாடி அருகில் வைத்து விட்டு கையெழுத்திட அலுவலகத்துக்கு சென்றதாக கூறப்படுகிறது. பின்னர் வந்து பார்த்தபோது கைப்பையை காணவில்லை. யாரோ திருடி சென்று விட்டது தெரிய வந்தது. இதுகுறித்து எடமலைப்பட்டிபுதூர் குற்றப்பிரிவு போலீசில் சந்தனகுமார் புகார் அளித்தார். அந்த கைப்பையில் 43,875 ரூபாய் மதிப்புள்ள டிக்கெட்டுகள், டி.சி, மார்க் சீட், ஏ.டி.எம் கார்டு ஆகியவை இருந்தது. இது குறித்து எடமலைப்பட்டிபுதூர் குற்றப்பிரிவு போலீஸ் சப்-இன்ஸ்பெக்டர் அன்புச்செல்வி வழக்குப் பதிந்து ஆள் நடமாட்டம் அதிகம் உள்ள பஞ்சப்பூர் பேருந்து நிலையத்தில் பணப்பையை திருடி சென்ற மர்ம நபரை வலைவீசி தேடி வருகிறார்.