திருச்சி பால்பண்ணை- துவாக்குடி சர்வீஸ் சாலை பணிகள் விரைவில் தொடங்கும்* முதல்வரின் முதல் நிலை செயலாளரை சந்தித்த பின் அமைச்சர் அன்பில் மகேஷ் பொய்யாமொழி தகவல்

திருச்சி-தஞ்சை சாலையில் பால்பண்ணை முதல் துவாக்குடி வரை சர்வீஸ் சாலை அமைக்க வேண்டும், என்பது திருவெறும்பூர் சட்டமன்ற தொகுதி மக்களின் நீண்ட கால கோரிக்கையாகும். இதுதொடர்பாக அந்த தொகுதி சட்டமன்ற உறுப்பினரும், பள்ளி கல்வித்துறை அமைச்சருமான அன்பில் மகேஷ் பொய்யாமொழி பல்வேறு நடவடிக்கைகளை மேற்கொண்டு வருகிறார்.இதன் ஒரு பகுதியாக சென்னை, தலைமைச் செயலகத்தில், இன்று(29-04-2025) துரை வைகோ எம்பி மற்றும் சர்வீஸ் சாலை மீட்பு கூட்டமைப்பினருடன் முதல்வரின் முதல் நிலை செயலர் மருத்துவர் பி. உமாநாத்தை அமைச்சர் சந்தித்து பேசினார். அப்போது அவர், எனது திருவெறும்பூர் சட்டமன்ற தொகுதிக்கு உட்பட்ட பால்பண்ணை – துவாக்குடி சர்வீஸ் சாலை அமைக்க வேண்டிய 15 ஆண்டுகால கோரிக்கை, அது குறித்த நீதிமன்ற தீர்ப்புரை, தமிழ்நாடு நெடுஞ்சாலைத் துறை பணிகள் குறித்து விவாதித்து தீர்வை உருவாக்கி, சர்வீஸ் சாலை அமைக்கும் பணியில் முன்னேற்றம் காண்பது தொடர்பாக எடுத்துரைத்தார். லட்சக்கணக்கான மக்கள் வசிக்கும் திருச்சி – தஞ்சை சாலையில் குறிப்பிட்ட பகுதியில் விபத்துகள் ஏற்படாதவாறு சர்வீஸ் சாலை அமைக்க வேண்டிய அப்பகுதி மக்களின் கோரிக்கை மிகவும் நியாயமானது என்றும், அவசியம் செய்துதர வேண்டும் என்றும் அமைச்சர், முதல்வரின் முதல் நிலைச் செயலரிடம் கேட்டுக்கொண்டார். அதனை ஏற்று, அடுத்தகட்டமாக தேசிய நெடுஞ்சாலைத்துறை அதிகாரிகளுடன் ஆலோசனைகளை மேற்கொண்டு, அனைவரும் ஏற்கும் வகையிலும், தேசிய நெடுஞ்சாலை விதிமுறைகளின்படி விரைவில் சர்வீஸ் சாலைக்கான பணிகள் தொடங்கும் என்று வாக்குறுதி அளித்தார் என அமைச்சர் அன்பில் மகேஷ் பொய்யாமொழி தெரிவித்தார்.