திருச்சி, லால்குடி அருகே சோக சம்பவம்: பள்ளி வகுப்பறையில் மயங்கி விழுந்த மாணவன் உயிரிழப்பு…! ( வீடியோ இணைப்பு)

திருச்சி மாவட்டம், லால்குடி அருகே உள்ள தச்சன்குறிச்சி பெருமாள் கோவில் தெருவை சேர்ந்த முருகானந்தம் மகன் வெற்றிவேலன்(13). இவன், அதே பகுதியில் உள்ள ஊராட்சி ஒன்றிய நடுநிலைப்பள்ளியில் எட்டாம் வகுப்பு படித்து வந்தான். இதய நோயால் பாதிக்கப்பட்டிருந்த வெற்றிவேலன் இதற்காக சிகிச்சை பெற்று வந்ததாக கூறப்படுகிறது. இந்தநிலையில் வழக்கம்போல இன்று(25-11-2024) பள்ளிக்குச் சென்ற வெற்றிவேலன் வகுப்பறையில் திடீரென மயங்கி கீழே விழுந்துள்ளான். இதனைப் பார்த்து அதிர்ச்சி அடைந்த வகுப்பு ஆசிரியர், வெற்றிவேலனை உடனடியாக அருகில் உள்ள அரசு ஆரம்ப சுகாதார நிலையத்திற்கு சிகிச்சைக்காக கொண்டு சென்றார். அங்கு மாணவனை பரிசோதித்த மருத்துவர்கள் அவன் ஏற்கனவே இறந்து விட்டதாக தெரிவித்தனர். இதுகுறித்த தகவலின்பேரில் காணக்கிளியநல்லூர் போலீசார் விசாரணை மேற்கொண்டு வருகின்றனர். வகுப்பறையில் மாணவன் மயங்கி விழுந்து உயிரிழந்த சம்பவம் ஆசிரியர்கள் மற்றும் சக மாணவர்கள் மத்தியில் பெரும் சோகத்தை ஏற்படுத்தி உள்ளது.