வடகாடு சம்பவத்தை கண்டித்து புதுக்கோட்டையில் மே 19-ம் தேதி விசிக சார்பில் ஆர்ப்பாட்டம்…! * திருச்சியில் திருமாவளவன் பேட்டி

திருச்சியில் விடுதலை சிறுத்தைகள் கட்சி சார்பில் மே 31-ம் தேதி “மதச்சார்பின்மையை காப்போம்” என்கிற மையக்கருத்தில் பேரணி நடைபெற உள்ளது. இந்த பேரணி குறித்தான டெல்டா மண்டல நிர்வாகிகள் ஆலோசனைக் கூட்டம் திருச்சியில் இன்று(15-05-2025) நடைபெற்றது. இந்த கூட்டத்தில் கலந்து கொள்ள வந்த விசிக தலைவர் திருமாவளவன் செய்தியாளர்களை சந்தித்தார். அப்போது அவர் கூறுகையில், அரசமைப்புக்கு எதிரான தாக்குதலை மத்திய அரசு செய்து வருகிறது. குடியுரிமை திருத்த சட்டம், முத்தலாக் தடை சட்டம் உள்ளிட்ட பல சட்டங்கள் மூலம் இஸ்லாமிய சமூகத்திற்கு எதிராக செயல்படுகிறார்கள். அரசமைப்பின் உயிர் மூச்சான கோட்பாடு மதச்சார்பின்மையாகும். அரசமைப்பு சட்டத்தை நீர்த்து போக செய்யும் வகையில் பா.ஜ.க செயல்பட்டு வருகிறது. அதில் ஒன்று தான் வக்ஃபு திருத்த சட்டமாகும். அதனை ரத்து செய்ய வேண்டும், மதச்சார்பின்மையை காக்க வேண்டும் என வலியுறுத்திதான் பேரணி நடைபெறுகிறது.
வடகாட்டில் ஆதி திராவிடர்கள் தாக்கப்பட்ட சம்பவம் தொடர்பாக ஆர்ப்பாட்டம் நடத்த காவல்துறையில் அனுமதி கேட்டோம். ஆனால் காவல்துறை அனுமதி வழங்காததால் இது தொடர்பாக மதுரை உயர்நீதிமன்றத்தில் வழக்கு தொடர்ந்தோம். வழக்கை விசாரித்த நீதிமன்றம் ஆர்ப்பாட்டம் நடத்த அனுமதி வழங்கியுள்ளது. மே 19-ம் தேதி மாலை புதுக்கோட்டையில் வி.சி.க சார்பில் என் தலைமையில் ஆர்ப்பாட்டம் நடைபெறும். பொள்ளாச்சி கூட்டு பாலியல் வன்கொடுமை வழக்கில் வரலாற்று சிறப்புமிக்க தீர்ப்பை நீதிமன்றம் வழங்கி உள்ளது. பா.ஜ.க. தமிழ் மாநில தலைவர் நயினார் நாகேந்திரன் சட்டம்- ஒழுங்கு தொடர்பாக வாய் புளித்ததோ மாங்காய் புளித்ததோ என்பது போல பேச கூடாது. வடகாட்டு பிரச்சினை தொடர்பாக பா.ஜ.க எந்த கருத்தையும் கூறவில்லை, போராட்டமும் நடத்தவில்லை. சட்டம்- ஒழுங்கு பிரச்சினை குறித்து பேசும் அவர்கள் சாதிய பிரச்சனைகள் குறித்தும் பேச வேண்டும். மக்களை திரட்டி போராட்டம் நடத்த வேண்டும். பா.ம.க மாநாட்டில் கருத்தியல் ரீதியாக யாரும் பேசவில்லை, உணர்ச்சியை தூண்டும் வகையில் தான் பேசியுள்ளார்கள் என்று தெரிவித்தார் பேட்டியின்போது கட்சி நிர்வாகிகள் உடன் இருந்தனர் .