“நாடோடி மன்னன்” முதல் “ஆதவன்” வரை… திரை உலகில் நடிகை சரோஜாதேவி கடந்து வந்த பாதை…!

நடிகை சரோஜா தேவி வயது முதிர்வு(87) காரணமாக பெங்களூருவில் இன்று( ஜூலை 14) காலமானார். தமிழ் திரைப்பட உலகில் 1960 களில் முன்னணி நடிகையாக வலம் வந்தவர் சரோஜாதேவி. கிட்டத்தட்ட 161 படங்களில் நடித்துள்ளார். இவர், கர்நாடக மாநிலம் மைசூர் ராஜியத்தில் 1938ம் ஆண்டு ஜனவரி 7ம் தேதி பிறந்தார். அவரது தந்தை பைரப்பா. தாய் ருத்ரம்மா. தந்தை காவல் அதிகாரி ஆவார். சரோஜா தேவியின் இயற்பெயர் ராதாதேவி. இவருக்கு சரஸ்வதிதேவி, பாமாதேவி, சீதாதேவி என்ற மூன்று அக்காவும் வசந்தாதேவி என்ற ஒரு தங்கையும் உள்ளனா். சரோஜா தேவி வீட்டின் நான்காவது மகளாக பிறந்தார். சிறுவயதிலேயே சரோஜா தேவியை பெற்றோர் நடனம் கற்றுக்கொள்ள ஊக்குவித்தனர். பின்னாளில் அவர் நடிப்பு பயணத்தையும் தொடர அவரது தந்தை ஊக்குவித்தார். தமிழ் திரையுலகில் 60 முதல் 70 வரையான காலகட்டங்களில் 17 வருடங்களாக முன்னணி நடிகையாக இருந்த சரோஜாதேவி, எம்.ஜி.ஆர், நடிகர் திலகம் சிவாஜி கணேசன், காதல் மன்னன் ஜெமினி கணேசன் ஆகிய 3 பேருடனும் கதாநாயகியாக நடித்து புகழ் பெற்றவர்.

ஒரு காலத்தில் ‘சூப்பர் ஸ்டார்’களை விட அதிகம் சம்பளம் வாங்கியவர் என்ற பெருமைகளை பெற்றவர் நடிகை சரோஜாதேவி. 1955ம் ஆண்டு ஹொன்னப்ப பாகவதர் தயாரித்த ‘மகாகவி காளிதாஸ்’என்ற கன்னடப்படத்தில் கதாநாயகியாக அறிமுகமானார். முதல் படமே அவருக்கு வெற்றி படமாக அமைந்தது. இந்த படத்தில் அவருக்கு தேசிய விருதும் கிடைத்தது. இதையடுத்து திரை உலகிற்காக ராதா தேவி என்ற தன் பெயரை சரோஜா தேவி என்று மாற்றி கொண்டார்.

தமிழில் 1958ம் ஆண்டு எம்ஜிஆர் நடித்த நாடோடி மன்னன் படத்தில் அறிமுகம் ஆனார். 1960-70 ஆம் ஆண்டுகளில் திரையுலகில் கோலோச்சி ரசிகர்கள் மனதில் இடம் பிடித்தார். 50 ஆண்டு கால திரைப்பட வாழ்க்கையில் 161 படங்களில் சரோஜா தேவி நடித்துள்ளார். கன்னடத்து பைங்கிளி, அபிநய சரஸ்வதி உள்ளிட்ட மொழிகளால் ரசிகர் களால் அழைக்கப்பட்டார். எம்.ஜி.ஆருடன் 26 படங்களிலும், சிவாஜி கணேசனுடன் 22 படங்களிலும் நடித்துள்ளார். கடைசியாக நடிகர் சூர்யா நடித்த ஆதவன் படத்தில் நடித்து இருந்தார்.

தமிழ் சினிமா ஜாம்பவான்களுடன் இணைந்து மறக்க முடியாத பல வெற்றிப் படங்களை அளித்த சரோஜா தேவி “அன்னை இல்லம்,” “நாடோடி மன்னன்,” “பாகப்பிரிவினை,” போன்ற படங்களில் அவரது பங்களிப்பு இன்றும் பேசப்படுகிறது. எம்ஜிஆர், சிவாஜி, ஜெமினி தவிர விஜயகாந்த் போன்ற நடிகர்கள் படத்திலும் நடித்து உள்ளார். கன்னடம், தமிழ், தெலுங்கு, இந்தி எனப் பல மொழித் திரைப்படங்களில் முன்னணி நாயகியாக வலம் வந்த இவருக்கு, பத்மஸ்ரீ மற்றும் பத்ம பூஷண் விருதுகளை வழங்கி மத்திய அரசு கௌரவித்துள்ளது. பல மாநில அரசுகளின் விருதுகளையும், வாழ்நாள் சாதனையாளர் விருதுகளையும் பெற்றுள்ளார். சரோஜா மறைவுக்குத் திரையுலக பிரபலங்களும், அரசியல் தலைவர்களும், ரசிகர்களும் சமூக வலைத்தளங்கள் வாயிலாக இரங்கல் தெரிவித்து வருகிறார்கள். 1967ம் ஆண்டு மார்ச் 1ம் தேதி ஸ்ரீ ஹர்ஷாவுடன் சரோஜா தேவிக்கு திருமணம் நடந்தது. இந்திரா, கவுதம் ராமசந்திரன் என்ற பிள்ளைகள் உள்ளனர். கணவர் ஸ்ரீஹர்ஷா 1986ம் ஆண்டு உடல்நலக் குறைவால் உயிரிழந்தார்.