போதை இல்லா தமிழகம், இரு மொழி கொள்கையை பின்பற்றுவது, மாநில தன்னாட்சி: கொள்கைகளை வெளியிட்டது தமிழக வெற்றி கழகம்…!

விக்கிரவாண்டியில் இன்று(27-10-2024) நடைபெறும் தமிழக வெற்றிக் கழகத்தின் முதல் மாநில மாநாட்டில் தலைவர் விஜயின் தலைமையில் அக்கட்சியின் கொள்கைகள் வெளியிடப்பட்டது.  தமிழக வெற்றி கழகத்தின் கொள்கைகளை வெளியிட்டார் அக்கட்சியின் தொண்டர்களில் ஒருவரான பேராசிரியர் முனைவர் சம்பத்குமார்.  மதம்,ஜாதி, நிறம், இனம், மொழி, பாலின அடையாளம், பொருளாதார என்கின்ற தனி அடையாளங்களுக்குள் மனித சமூகத்தை சுருக்காது, தமிழ்நாட்டில் வாழும் அனைத்து மக்களின் தனிமனித சமூக பொருளாதார, அரசியல் உரிமைகளை நிலை நிறுத்தி எல்லோருக்கும் எல்லாமுமான சமநிலை சமூகம் உருவாக்குவது தான் தமிழக வெற்றி கழகத்தினுடைய குறிக்கோள். நம்முடைய கொள்கை மதச்சார்பற்ற சமூக நீதிக் கொள்கைகள் . ஒரு நாட்டின் மக்களை அவர்கள் சார்ந்த இனம், மதம், மொழி,சாதி,பாலினம் குறித்து பாகுபடுத்தாமல் சம உரிமைகளை அவர்களுக்கு உத்தரவாதப்படுத்தி  சாத்தியப்படுத்துவது.  ஆட்சி அதிகாரம், சட்டம், அரசு இயந்திரங்களை தவறாக பயன்படுத்தி வெகுஜன மக்களின் அடிப்படை சுதந்திர உரிமைகளை பறிக்கும் மத்திய, மாநில ஆட்சியாளர்களின் மக்கள் விரோத செயல்பாடுகளை எதிர்த்து மக்களுக்கான ஜனநாயக உரிமைகளை நிலை நிறுத்துவது.  ஏற்றத்தாழ்வுகளை அகற்றி, சாதி முழுவதுமாக ஒழிக்கப்படும் காலகட்டம் வரை அனைத்து பிரிவினருக்கும் அனைத்து துறைகளிலும் விகிதாச்சார அடிப்படையில் பிரதிநிதித்துவம் வழங்குவதே தமிழக வெற்றி கழகத்தினுடைய சமதர்ம சமூக நீதியாகும்.  சமத்துவம், சாதி, மதம், இனம், நிறம், மொழி பொருளாதார வர்க்கம் மற்றும் பாலின சமத்துவத்தினுடைய உரிமை எல்லா நிலைகளிலும் ஆண்களுக்கு நிகரானவர்கள் பெண்கள், மூன்றாம் பாலினத்தோர் மாற்றுத்திறனாளிகள் எல்லா வகைகளிலும் மற்றவர்களுக்கு சமமானவர்களே என்பது நம்முடைய சமத்துவம், மதச்சார்பின்மை. மதச்சார்பற்ற தனிப்பட்ட மத நம்பிக்கையிலும் தலையீடற்ற, அனைத்து மதத்தவரையும் மத நம்பிக்கை அற்றவரையும் சமமாக பாவிக்கும் அரசு ஆட்சி நிர்வாகம் தான் நம்முடைய மதச்சார்பின்மை கொள்கைகள்.

மாநில தன்னாட்சி மாநில தன்னாட்சி உரிமையே அந்தந்த மாநில மக்களின் தலையாய உரிமை. மாநில தன்னாட்சிக்குட்பட்ட உரிமைகளை தமிழக வெற்றி கழகத்தினுடைய மாநில தன்னாட்சி உரிமையாகும்.  இரு மொழி கொள்கை தாய் மொழியாகிய தமிழ் உலகத்திற்கான இணைப்பு மொழியாகிய ஆங்கிலம் என இரு மொழிக் கொள்கையே தமிழக வெற்றிக்கழகம் பின்பற்றுகிறது. தமிழே ஆட்சி மொழி, தமிழே வழக்காடு மொழி, தமிழே வழிபாட்டு மொழி தமிழ் வழி கல்விக்கு அரசு வேலைவாய்ப்பில் முன்னுரிமை வழங்கப்படும். அரசியல் தலையீடு அற்ற அடிப்படை உரிமைகளை நிலைநாட்டும் நிர்வாகம், அரசுத்துறை மற்றும் தனியார் துறை என்று எந்த துறையிலும் அரசியல் தலையீடு அற்ற லஞ்ச லாவண்யம் அற்ற நிர்வாகத்தை கொண்டு வருவோம். மத, இன, மொழி, வர்க்க பேதமற்ற வகையில் கல்வி, சுகாதாரம், தூய காற்று, தூய குடிநீர் என்பது எல்லோருக்குமான அடிப்படை உரிமை. சுற்றுச்சூழல், இயற்கை வளங்கள் ஆகியவற்றை பாதுகாப்பது அரசின் தலையாய கடமையாகும். பகுத்தறிவு சிந்தனை மனப்பான்மை, மனித குலத்தின் உடல், மன, குணநலன்களுக்கு கேடாக அமையும் வகையில் உள்ள பிற்போக்கு சிந்தனைகளை நிராகரிப்பது.  தீண்டாமை ஒழிப்பு, பழமைவாத விளக்கங்களை நிராகரிப்பது, தீண்டாமை ஒழிப்பின் முதல் படி ஆகும். இயற்கை வள பாதுகாப்பு, சூழலியல் மற்றும் காலநிலை நெருக்கடியை எதிர்கொள்ளக்கூடிய இயற்கைக்கு ஊறு விளைவிக்காத பகுதி சார் மாநில வளர்ச்சி பரவலாக்கம், போதையில்லாத் தமிழகம், உற்பத்தித்திறன் உடல் மற்றும் உள்ள நலம் கெடுக்கும் சமூக சீர்கேட்டுக்கு வழிவகுக்கும் போதை அறவே இல்லாத தமிழகம் .இதுவே தமிழக வெற்றிக் கழகத்தினுடைய அடிப்படைக் கொள்கைகள் ஆகும் என தெரிவித்தார்.