மேஜர் சரவணன் நினைவு ஸ்தூபியில் முதல்வர் மு.க.ஸ்டாலின் மலர் தூவி மரியாதை…!

கடந்த 1999-ம் ஆண்டு இந்தியா- பாகிஸ்தான் இடையே கார்கில் போர் மூண்டது. இதில், இந்திய வீரர்கள் பாகிஸ்தான் படையினரை விரட்டி அடித்தனர். இதில் மேஜர் சரவணன் உள்ளிட்ட பல்வேறு நிலை அதிகாரிகள், வீரர்கள் தங்கள் இன்னுயிரை ஈந்து இந்தியாவிற்கு பெரும் வெற்றியை தேடித்தந்தனர். கார்கில் வெற்றியை போற்றும் வகையில் ஆண்டுதோறும் ஜூலை மாதம் 26- ம் தேதி கார்கில் போர் வெற்றி நாளாக கொண்டாடப்படுகிறது. கார்கில் போரில் பங்கேற்று வீர மரணம் அடைந்த திருச்சியை சேர்ந்த மேஜர் சரவணனை போற்றும் வகையில் திருச்சி மாவட்ட ஆட்சியர் சாலையில் மேஜர் சரவணனுக்கு நினைவு ஸ்தூபி கட்டப்பட்டுள்ளது. இந்த நினைவிடத்தில் முதலமைச்சர் மு.க.ஸ்டாலின் இன்று ( 26.07.2023 ) மலர்வளையம் வைத்து, மலர் தூவி மரியாதை செலுத்தினார். அப்போது அமைச்சர்கள் துரைமுருகன், கே.என்.நேரு, அன்பில் மகேஷ் பொய்யாமொழி,  ஆ.ராசா எம்.பி , மாவட்ட ஆட்சியா் மா. பிரதீப்குமார் ஐஏஎஸ், திருச்சி கிழக்கு சட்டமன்ற உறுப்பினா்  இனிகோ இருதயராஜ், மாநகராட்சி ஆணையர் வைத்திநாதன், மேஜர் சரவணன் அறக்கட்டளை தலைவர் செந்தில்குமார் ஆகியோர் உடன் இருந்தனர்.