ராத்திரியில் “பவர் கட்”..!- சாலை மறியலில் ஈடுபட்ட மக்கள் மீது தடியடி ! திருச்சியில் பதற்றம்! (வீடியோ இணைப்பு)

திருச்சி மாநகராட்சிக்குட்பட்ட திருவானைக்கோவில், கொண்டையம் பேட்டை மற்றும் சுற்றியுள்ள பகுதிகளில் கடந்த 15 நாட்களுக்கும் மேலாக தினமும் இரவு நேரங்களில் பவர் கட்டாவதாக கூறப்படுகிறது. இதனால் வீட்டில் பயன்படுத்தப்படும் டிவி, பிரிட்ஜ், வாஷிங் மெஷின் உள்ளிட்ட பொருட்கள் குறைந்த மின் அழுத்தம் காரணமாக பழுதாகின்றன. இது தொடர்பாக மின்வாரியத்திற்கு தகவல் தெரிவித்தும் இதுரை எந்தவிதமான நடவடிக்கையும் எடுக்கப்படவில்லை என இப்பகுதி மக்கள் குமுறுகிறார்கள். இந்நிலையில், இன்று ( ஏப்ரல் -25 ) காலை 200க்கும் மேற்பட்ட பொதுமக்கள் திருவானைக்காவல் மெயின் ரோட்டில் திடீர் சாலை மறியலில் ஈடுபட்டனர். இதனால் அப்பகுதியில் போக்குவரத்து பெரிதும் பாதிக்கப்பட்டது. அப்போது அங்கு வந்த போலீசாருக்கும், பொது மக்களுக்கும் இடையே பெரும் வாக்குவாதம் ஏற்பட்டது. இதைத் தொடர்ந்து போலீசார் லேசான தடியடி நடத்தி கூட்டத்தை கலைத்தனர்.சாலை மறியல் போராட்டம் நடத்தியதாக நான்கு பேர் போலீசாரால் கைது செய்யப்பட்டுள்ளனர். இதனால் அப்பகுதியில் பதட்டமான சூழல் நிலவி வருகிறது