திருச்சி, சமயபுரம் பகுதியில் உள்ள பிரபல தனியார் பள்ளிக்கு வெடிகுண்டு மிரட்டல் – மாணவ, மாணவிகள் அவசர, அவசரமாக வெளியேற்றம்…! (வீடியோ இணைப்பு)

திருச்சி மாவட்டம், சமயபுரம் அடுத்து பளூர் என்ற பகுதியில் தனியார் மேல்நிலைப் பள்ளி ஒன்று செயல்பட்டு வருகிறது.  இந்தப் பள்ளியில் ஆயிரத்திற்கும் மேற்பட்ட மாணவ, மாணவிகள் படித்து வருகின்றனர். இந்தநிலையில் இன்று(11-11-2024) காலை சுமார் 11 மணிக்கு பள்ளி நிர்வாகத்தின் இ-மெயிலுக்கு, வெளியில் இருந்து ஒரு மெயில் வந்தது. அதில், பள்ளியில் வெடிகுண்டு வைக்கப்பட்டுள்ளது என்று தெரிவிக்கப்பட்டு இருந்தது. இதுகுறித்து உடனே போலீஸாருக்கு தகவல் தெரிவித்த பள்ளி நிர்வாகத்தினர், மாணவ- மாணவிகளை அவசர, அவசரமாக வெளியேற்றி அருகில் உள்ள மரத்தடியில் அமர வைத்தனர். வெடிகுண்டு தகவலின்பேரில் சம்பவ இடத்திற்கு வெடிகுண்டு கண்டறியும் நிபுணர்கள், மோப்ப நாயுடன் பள்ளிக்கு விரைந்து வந்து அங்குலம், அங்குலமாக சோதனை மேற்கொண்டு வருகின்றனர். இந்த சம்பவத்தால் மாணவர்கள் மற்றும் பெற்றோர்கள் அதிர்ச்சியில் உறைந்தனர். கடந்த சில நாட்களாகவே திருச்சி மாவட்டத்தில் உள்ள பிரபல தனியார் பள்ளிகள், வெளிநாட்டு சுற்றுலா பயணிகள் தங்கும் ஹோட்டல்கள் உள்ளிட்ட பல்வேறு இடங்களுக்கு வெடிகுண்டு மிரட்டல் விடுக்கப்பட்ட வருகிறது. இது போன்ற செயல்களில் ஈடுபடும் நபர்கள் மீது கடும் நடவடிக்கை எடுக்க வேண்டும் என்று மாணவர்களின் பெற்றோர்கள் கோரிக்கை விடுத்துள்ளனர்.