30 வழக்குகளில் தொடர்புடையவர் துப்பாக்கி முனையில் கைது- மனைவி வெளியிட்ட ஆடியோவால் பரபரப்பு….

கூடுவாஞ்சேரியை அடுத்த ஆதனூர் பகுதியை சேர்ந்தவர் சைலு என்கிற சைலேந்தர் (34). இவர் மீது சேலையூர், பீர்க்கன்காரணை, சங்கர் நகர், கூடுவாஞ்சேரி, ஓட்டேரி, குன்றத்தூர், மணிமங்கலம் உள்ளிட்ட காவல் நிலையங்களில் 6 கொலை வழக்குகள் உள்பட 30க்கும் மேற்பட்ட குற்ற வழக்குகள் நிலுவையில் உள்ளன. கடந்த 4 ஆண்டுகளாக நீதிமன்றத்தில் ஆஜராகாமல் தலைமறைவாக இருந்த அவரை தாம்பரம் மாநகர காவல் துணை ஆணையரின் தனிப்படை போலீசார் தேடி வந்தனர். இந்நிலையில், சைலேந்தர் ராஜபாளையத்தில் பதுங்கி இருப்பதாக தனிப்படை போலீசாருக்கு தகவல் கிடைத்தது.

அதன்பேரில், அங்கு சென்ற தனிப்படை போலீசார் நேற்று ( 30.11.2023 ) நள்ளிரவு 1.30 மணியளவில் துப்பாக்கி முனையில் சைலேந்தரை கைது செய்து, அவரை ரகசிய இடத்தில் வைத்து விசாரணை நடத்தி வருகின்றனர். இந்நிலையில் சைலேந்திரின் மனைவி பொன்மலர் பேசிய ஆடியோ ஒன்று வெளியாகி உள்ளது. அதில், நாங்கள் சென்னையை விட்டு வந்து 5 வருடங்கள் ஆகிறது.

ஒரு மகாசபை தலைவரின் சேம்பரில் வேலை செய்து வருகிறோம். தற்போது எனது கணவர் எந்த ஒரு குற்றச்செயல்களிலும் ஈடுபடாமல் திருந்தி வாழ்ந்து கொண்டிருக்கிறார். எந்த வழக்குக்காக அவரை போலீசார் அழைத்து சென்றார்கள் என்று தெரியவில்லை. கடந்த 4 ஆண்டுகளாக உழைத்து சம்பாதித்து எங்கள் குடும்பத்தை காப்பாற்றி வருகிறார், எங்களை வாழ விடுங்கள் என அந்த ஆடியோவில் பேசியிருந்தார். இந்த ஆடியோ சமூக வலைதளங்களில் வைரலாகி பரபரப்பை ஏற்படுத்தி உள்ளது.