திருச்சி குணசீலம் பிரசன்ன வெங்கடாஜலபதி கோவில் தேரோட்டம்…(படங்கள்)

திருச்சி மாவட்டம், முசிறி அருகே உள்ள குணசீலம் வெங்கடாஜலபதி கோவில் பிரம்மோற்சவ விழா கடந்த 17-ந்தேதி கொடியேற்றத்துடன் தொடங்கியது. இதனையொட்டி , தினமும் பெருமாள் ஹனுமந்த வாகனம், கருட வாகனம், சேஷ வாகனம், யானை வாகனம் உள்ளிட்ட பல்வேறு வாகனங்களில் எழுந்தருளி பக்தர்களுக்கு அருள்பாலித்தார். விழாவின் முக்கிய நிகழ்ச்சியான தேரோட்டம் இன்று ( 26.09.2023 ) விமரிசையாக நடைபெற்றது. முன்னதாக காலை 5-30 மணிக்கு பெருமாள் உபய நாச்சியார்களுடன் தேரில் எழுந்தருளினார். அதைத் தொடர்ந்து மேளதாளங்கள் முழங்க அதிர்வேட்டுகளுடன் காலை 8.30 மணிக்கு தேரோட்டம் தொடங்கியது.

இதில், திருச்சி மாவட்ட ஆட்சியர் மா.பிரதீப்குமார் ஐஏஎஸ் , காடுவெட்டி தியாகராஜன் எம்.எல்.ஏ, ஊராட்சி மன்ற தலைவர் குருநாதன் மற்றும் ஆயிரக்கணக்கான பக்தர்கள் கலந்து கொண்டு தேரை வடம் பிடித்து இழுத்தனர். பக்தர்கள் தங்கள் வேண்டுதல்களை நிறைவேற்றும் வகையில் பக்தி பரவசத்துடன் அங்கப்பிரதட்சணம் செய்தனர்.