திருமணத்துக்கு 5 நாட்களே இருந்த நிலையில் யூடியூபர் தற்கொலை: வாட்ஸ் அப் ஸ்டேட்டஸ்-ல் உருக்கமான பதிவு…!

தேனி மாவட்டம், கம்பம் அருகே உள்ள ஊத்துக்காடு பகுதியைச் சேர்ந்தவர் பெரிய கருப்பன். இவருடைய மகன் ராஜ்குமார் (வயது 27). பட்டதாரியான இவர், யூடியூப் சேனல்  ஒன்றை நடத்தி வந்தார்.  இவருக்கும், கம்பத்தைச் சேர்ந்த ஒரு பெண்ணுக்கும் வருகிற 5-ம் தேதி கம்பத்தில் உள்ள திருமண மண்டபத்தில் திருமணம் நடைபெற இருந்தது. திருமணத்துக்கான அழைப்பிதழை உறவினர்களுக்கும், நண்பர்களுக்கும் ராஜ்குமார் கொடுத்து வந்தார். இந்த நிலையில் நேற்று காலை வீட்டை விட்டு தனது மோட்டார் சைக்கிளில் வெளியே சென்றவர் நீண்ட நேரம் ஆகியும் வீடு திரும்பவில்லை. அவரை உறவினர்கள் பல்வேறு இடங்களில் தேடி வந்த நிலையில் கம்பம் நகராட்சி உரக்கிடங்கு அருகே உள்ள விளையாட்டு மைதானத்தில் ராஜகுமார் விஷத்தை குடித்துவிட்டு மயங்கி கிடந்தார். இதுகுறித்து தகவல் அறிந்த உறவினர்கள் பதறி அடித்துக் கொண்டு சம்பவ இடத்துக்கு சென்று ராஜ்குமாரை மீட்டு கம்பம் அரசு மருத்துவமனைக்கு கொண்டு சென்றனர். அங்கு அவரை பரிசோதனை செய்த மருத்துவர்கள் ராஜ்குமார் ஏற்கனவே இறந்து விட்டதாக தெரிவித்தனர்.  இதுகுறித்து கம்பம் தெற்கு போலீசார் வழக்கு பதிவு செய்து விசாரணை நடத்தினர்.  முதல் கட்ட விசாரணையில், அவர் கடைசியாக மணப்பெண்ணிடம் வீடியோ கால் மூலம் பேசியது தெரிய வந்தது.  அப்போது அவர்கள்
2 பேரும் என்ன பேசினார்கள் என்பது தெரியவில்லை.  இது தொடர்பாக அந்த பெண்ணிடம் போலீசார் விசாரணை நடத்தினர்.  ஆனால், அந்த பெண் தொடர்ந்து அழுது கொண்டே இருந்ததால் தகவல்களை பெற முடியவில்லை என்று கூறினர். தற்கொலை செய்து கொண்ட ராஜ்குமார், தனது செல்போன்  வாட்ஸ் அப்
ஸ்டேட்டஸில் சினிமா பாடல் ஒன்றை பதிவிட்டு இருந்தார்.  அதில், கோவில் தான் போனாலும் புண்ணியம் செய்தாலும் என்னுடைய பாவம் தீருமோ? இந்த உலகில் இன்று தான் இன்று தான் என் முகத்தை பார்க்கிறேன் கண்ணிலே ஈரம் சேருதே கவலையும் காலம் மாற்றுவது என்று பதிவிட்டு இருந்தார். இந்த வரிகளை அவர் ஏன் ஸ்டேட்டஸில் வைத்திருந்தார் என்பது தெரியவில்லை.  இதுதொடர்பாக அவரது நண்பர்கள், உறவினர்களிடம் போலீசார் விசாரித்து வருகின்றனர். திருமணத்திற்கு 5 நாட்களே இருந்த நிலையில் ராஜ்குமார் தற்கொலை செய்து கொண்ட சம்பவம் உறவினர்கள் மற்றும் நண்பர்களிடையே பெரும் சோகத்தை ஏற்படுத்தி உள்ளது.