இந்தியாவில் வியாபாரம் செய்ய வெளிநாட்டு இந்தியர்களின் ஆவணங்கள், நடைமுறைகளை எளிதாக்க அரசின் நடவடிக்கைகள் என்னென்ன?* நாடாளுமன்றத்தில் அருண்நேரு எம்.பி. கேள்வி…

நாடாளுமன்றத்தில் பெரம்பலூர் அருண் நேரு எம்.பி. பேசுகையில், “நாட்டின் அனைத்து சொத்து பதிவு நடவடிக்கைகளுக்கும் ஆதார் அவசியமாக்கப்பட்டுள்ளதை முன்னிட்டு, ஆதார் எண்ணை பெறுவதற்கான தனி செயல்முறையை அரசு முன்மொழிகிறதா?. குறிப்பாக, வெளிநாட்டில் வசிக்கும் இந்தியர்கள் (என்.ஆர்.ஐ.)எதிர்கொள்ளும் பல்வேறு சிக்கல்கள் மற்றும் இந்தியாவில் வியாபாரம் செய்ய வெளிநாட்டு இந்தியர்களின் ஆவணங்கள் மற்றும் நடைமுறைகளை எளிதாக்க அரசின் நடவடிக்கைகள் என்னென்ன? என்று கேள்வி எழுப்பினார். இதற்கு, பதில் அளித்து மின்சாரம் மற்றும் தகவல் தொழில்நுட்ப துறை மத்திய அமைச்சர் ஜிதின் பிரசாத் கூறுகையில், ஆதார் என்பது உலகின் மிகப்பெரிய பயோமெட்ரிக் அடையாள அமைப்பாகும். இதில் 133 கோடிக்கு மேற்பட்ட இந்தியர்கள் பதிவு செய்துள்ளனர். 13.270 கோடிக்கும் அதிகமான அங்கீகார பரிவர்த்தனைகள் நடைபெற்றுள்ளன. சரியான இந்தியப் பாஸ்போர்ட் உள்ள எந்த வெளிநாட்டு இந்தியரும் (என்.ஆர்.ஐ) இந்தியாவிற்கு வருகை தந்தவுடன் உடனடியாக ஆதார் பதிவு மையத்தில் விண்ணப்பித்து, குடியுரிமை கால அவகாசத்தை எதிர்பார்க்காமல் ஆதார் எண்ணைப் பெறலாம். அதன் பின்னர், யுஐடிஏஐ அந்த என்.ஆர்.ஐ. யின் பயோமெட்ரிக் தகவல்கள் (கைரேகை, கண்தோற்றம்) மற்றும் மக்கள் தொடர்பு விவரங்களை (பெயர், முகவரி, முதலியன) சரிபார்த்து, ஆதார் தரவுத்தளத்தில் ஏற்கெனவே உள்ள பதிவுகளுடன் முரண்பாடுகள் ஏற்படாமல் உறுதி செய்யும். இந்த தரவுகள் சரிபார்க்கப்பட்டதும், யு.ஐ.டி.ஏ.ஐ. ஒரு தனித்துவமான ஆதார் எண்ணை உருவாக்குகிறது. இதன்மூலம் அந்த என்.ஆர்.ஐ.இந்தியாவில் உள்ள பல்வேறு சேவைகளில் தன்னை உறுதிப்படுத்திக் கொள்ளலாம். இந்தியாவில் வெளிநாட்டு இந்தியர்கள் வியாபாரம் செய்ய தேவையான ஆவணப் பணிகளை குறைக்க மற்றும் நடைமுறைகளை எளிதாக்க அரசாங்கம் பல முக்கிய நடவடிக்கைகளை மேற்கொண்டுள்ளது. இதில் மேக் இன் இந்தியா மற்றும் ஸ்டார்ட் அப் இந்தியா போன்ற திட்டங்கள் இடம்பெற்றுள்ளன. இது எளிய பதிவு முறைகள், வரிவிலக்கு மற்றும் புதிய தொழில்கள் தொடங்குவதற்கான விரைவான அனுமதிகள் போன்ற சலுகைகளை வழங்குகிறது. அதேபோல், ஆன்லைன் இணையதளங்கள் உருவாக்கப்பட்டுள்ளன. இது வெளிநாட்டு இந்தியர்களுக்கு நிறுவனங்களை பதிவு செய்ய, வரி பதிவு மேற்கொள்ள, மற்றும் பிற தேவையான அதிகாரப்பூர்வ பணிகளை டிஜிட்டலாக முடிக்க வாய்ப்பளிக்கிறது. இதன்மூலம் அதிகமான ஆவணப்பணிகளை குறைத்து எளிமை செய்யப்பட்டுள்ளது என்று கூறினார்.