தமிழகத்தில் உள்ள 39 தொகுதிகளிலும் அதிக வாக்குகள் வித்தியாசத்தில் வெற்றி பெறுவோம்- அமைச்சர் அன்பில் மகேஷ் பொய்யாமொழி…!

இந்தியாவின் மிகப்பெரிய ஜனநாயக திருவிழாவாக கருதப்படும் நாடாளுமன்ற தேர்தல் 7 கட்டங்களாக நடைபெறுகின்றன.
முதல் கட்டமாக தமிழகம் மற்றும் புதுச்சேரியில் உள்ள 40 தொகுதிகளில் இன்று(19-04-2024) முதல் கட்ட வாக்குப்பதிவு நடந்து வருகிறது. காலை 7 மணி முதல் வாக்காளர்கள் தங்களது வாக்குகளை செலுத்தி வருகின்றனர். அந்தவகையில், திருச்சி மேற்கு சட்டமன்ற தொகுதிக்கு உட்பட்ட கிராப்பட்டி லிட்டில் பிளவர் பள்ளியில் உள்ள வாக்கு சாவடி மையத்தில் பள்ளிக்கல்வித் துறை அமைச்சர் அன்பில் மகேஷ் பொய்யாமொழி தனது குடும்பத்துடன் வந்து வாக்களித்தார்.
அவருடன் முன்னாள் சட்டமன்ற உறுப்பினர் அன்பில் பெரியசாமியும் வந்து வாக்களித்தார். பின்னர் செய்தியாளர்களிடம் அமைச்சர் கூறுகையில்,
பொறுப்பான மனிதராக வரவேண்டும் என்றாலும், பொறுப்புக்கு மனிதன் வரவேண்டும் என்று சொன்னாலும் பள்ளிக்கூடத்திற்கு தான் வந்தாக வேண்டும்.
நான் வேட்பாளராக வாக்களித்துள்ளேன், சட்டமன்ற உறுப்பினராக வாக்களித்துள்ளேன், இப்போது பள்ளி கல்வித்துறை அமைச்சராக பள்ளியில் வாக்களிப்பது புது அனுபவமாக உள்ளது. எங்கள் சாதனைகளை சொல்லி வாக்கு கேட்டுள்ளோம். பயனாளிகளான மக்கள் எங்களுக்கு ஆதரவு தருவார்கள் என்ற நம்பிக்கை உள்ளது. ஆகவே, தமிழகத்தில் 39 தொகுதிகளிலும் அதிகப்படியான வாக்குகள் வித்தியாசத்தில் வெற்றி பெறுவோம் என தெரிவித்தார்.