ஆன்லைன் சூதாட்டத்தில் லட்சக்கணக்கில் பணத்தை இழந்த எல்ஐசி ஏஜென்ட் எடுத்த துயர முடிவு…!

சேலம், கருப்பூர் அம்மன் கோவில் தெருவை சேர்ந்த செல்வம் மகன் ஹரி கிருஷ்ணன் (வயது 29). எல்.ஐ.சி. முகவர். இவர், கடந்த 2 ஆண்டுகளாக ஆன்லைன் சூதாட்டத்தில் ஈடுபட்டு வந்ததாகவும், இதில் பல லட்சம் ரூபாயை இழந்ததாகவும் கூறப்படுகிறது. மேலும், வங்கிகள், நண்பர்களிடம் கடன் வாங்கி சூதாட்டத்தில் ஈடுபட்டுள்ளார். கடன் கொடுத்தவர்கள் ஹரிகிருஷ்ணனுக்கு நெருக்கடி கொடுத்ததாக தெரிகிறது. இதில் மனம் உடைந்த ஹரி கிருஷ்ணன் வீட்டில் சாப்பிட்டு விட்டு தூங்க சென்றவர் காலை 8 மணி ஆகியும் கதவை திறக்கவில்லை. அவருடைய தந்தை கதவை தட்டி பார்த்துள்ளார். ஹரிகிருஷ்ணன் அறையில் இருந்து எந்த சத்தமும் இல்லை. ஜன்னல் வழியாக பார்த்தபோது மின்விசிறியில் ஹரிகிருஷ்ணன் தூக்கில் பிணமாக தொங்கினார். இதைக்கண்டு அதிர்ச்சி அடைந்த குடும்பத்தினர் கதறி அழுதனர். தகவல் அறிந்த கருப்பூர் போலீசார், சம்பவ இடத்திற்கு விரைந்து வந்து ஹரிகிருஷ்ணன் உடலை மீட்டு பிரேத பரிசோதனைக்கு அரசு மருத்துவமனைக்கு அனுப்பி வைத்தனர்.  மேலும், இதுகுறித்து போலீசார் வழக்குப்பதிவு செய்து ஆன்லைன் சூதாட்டத்தில் பணத்தை இழந்ததால் ஹரிகிருஷ்ணன் தற்கொலை செய்து கொண்டாரா? அல்லது வேறு ஏதேனும் காரணமா? என்பது குறித்து விசாரணை நடத்தி வருகின்றனர்.