Rock Fort Times
Online News

” நீட்” தேர்வுக்கு தயாராகி வந்த தமிழக மாணவி தூக்கிட்டு தற்கொலை…!

நாடு முழுவதும் அரசு மற்றும் தனியார் மருத்துவக் கல்லூரிகளில் உள்ள எம்.பி.பி.எஸ்., பி.டி.எஸ். படிப்புகள் மற்றும் சித்தா, ஆயுர்வேதா, யுனானி, ஓமியோபதி படிப்புகள் மற்றும் கால்நடை மருத்துவப் படிப்பின் அகில இந்திய ஒதுக்கீட்டு இடங்களுக்கு நீட் தேர்வு மூலம் மாணவர் சேர்க்கை நடைபெற்று வருகிறது. அதேபோன்று, ராணுவக் கல்லூரிகளில் பி.எஸ்.சி. நர்சிங் படிப்புக்கு நீட் தேர்வு கட்டாயமாக்கப்பட்டுள்ளது. இந்த நீட் தேர்வை தேசிய தேர்வுகள் முகமை (என்.டி.ஏ.) ஆண்டுதோறும் நடத்தி வருகிறது. இந்நிலையில் 2025-2026-ம் கல்வி ஆண்டுக்கான நீட் தேர்வு இன்று (04-05-2025) நடைபெற்றது. நாடு முழுவதும் நீட் தேர்வை எழுத சுமார் 22 லட்சம் பேர் விண்ணப்பித்திருந்தனர். தமிழகத்தை பொறுத்தவரை 1.5 லட்சம் பேர் விண்ணப்பித்து இருந்தனர். தமிழகத்தில் சென்னை, மதுரை, திருச்சி உள்பட 31 மாவட்ட தலைநகரங்களில் நீட் தேர்வு நடந்தது. இந்நிலையில் தமிழகத்தைச் சேர்ந்த மாணவி ஒருவர் நீட் தேர்வு எழுத தன்னை தயார்படுத்தி வந்த நிலையில் இன்று திடீரென தூக்கு போட்டு தற்கொலை செய்து கொண்டார். செங்கல்பட்டு மாவட்டம், மதுராந்தகத்தைச் சேர்ந்த கயல்விழி என்ற மாணவி தேர்வு பயம் காரணமாக தற்கொலை செய்து கொண்டதாக கூறப்படுகிறது. கயல்விழியின் உடலை மீட்ட மேல்மருவத்தூர் போலீசார், இது தொடர்பாக தீவிர விசாரணை நடத்தி வருகின்றனர்.

Comments are closed.

Rockfort Times செய்திகளை உடனுக்குடன் அறிந்து கொள்ள வேண்டுமா? இல்லை ஆம்