நீதிமன்ற அவமதிப்பு வழக்கில் தமிழக அரசுக்கு ரூ.25 லட்சம் அபராதம்…! * மதுரை உயர் நீதிமன்றம் அதிரடி

திருச்சி மாவட்ட ஆட்சியருக்கு எதிராக சாந்தி, பாலாஜி, விஷ்ணுவர்தன், உமா மகேஸ்வரி, பவானி ஆகியோர் உயர் நீதிமன்ற மதுரை அமர்வில் நீதிமன்ற அவமதிப்பு வழக்கு தொடர்ந்தனர். அதில், திருச்சி மாவட்டம், தொட்டியம் தாலுகா, ஸ்ரீனிவாசநல்லூரில் காவிரி ஆற்றில் 2001 முதல் 2004 வரை மணல் குவாரி நடத்த உரிமம் பெற்றிருந்தோம். அடுத்த சில மாதங்களில் மணல் குவாரிகளை அரசே ஏற்று நடத்தியது. மணல் குவாரிகளை அரசு ஏற்றதற்கு எதிராக உயர் நீதிமன்றத்தில் வழக்கு தொடர்ந்தோம். அந்த வழக்கில் அரசின் உத்தரவை நீதிமன்றம் உறுதி செய்த போதிலும், நாங்கள் சில மாதங்கள் குவாரி நடத்த அனுமதி வழங்கியது. இதற்கு எதிராக அப்போதைய திருச்சி மாவட்ட ஆட்சியர் தரப்பில் உச்ச நீதிமன்றத்தில் மேல்முறையீடு செய்யப்பட்டது. இதனை விசாரித்த உச்ச நீதிமன்றம் உயர் நீதிமன்ற உத்தரவை உறுதி செய்தது.
அதன் பின்னரும் உயர் நீதிமன்ற உத்தரவை மாவட்ட நிர்வாகம் அமல்படுத்தவில்லை. எனவே உயர் நீதிமன்ற உத்தரவை நிறைவேற்றாத திருச்சி மாவட்ட ஆட்சியர் மீது அவமதிப்பு நடவடிக்கை எடுக்க வேண்டும். இவ்வாறு அந்த மனுவில் கூறப்பட்டிருந்தது. இந்த மனுவை விசாரித்து நீதிபதி குமரேஷ்பாபு, மணல் குவாரி நடத்தும் பொறுப்பை அரசு ஏற்றபின்பு மனுதாரர்களுக்கு ஆறு மாதம் குவாரி நடத்த உச்ச நீதிமன்றம் அனுமதி வழங்கியது. இருப்பினும் மாவட்ட நிர்வாகம் பல்வேறு காரணங்களை கூறி குவாரி நடத்த மனுதாரர்களுக்கு அனுமதி வழங்கவில்லை. மனுதாரர்கள் பல மனுக்கள் அனுப்பியும், நீதிமன்றத்தில் உத்தரவுகள் பெற்றும் மாவட்ட ஆட்சியர் நடவடிக்கை எடுக்கவில்லை. உயர் நீதிமன்ற உத்தரவு 15 ஆண்டுகளாக நிறைவேற்றப்படாமல் உள்ளது. இந்தக் காலகட்டத்தில் பல மாவட்ட ஆட்சியர்கள் பொறுப்பில் இருந்து மாறியிருப்பார்கள். இதனால் தற்போதைய ஆட்சியரை மட்டும் குறை சொல்வதால் எந்த பயனும் இல்லை. எனவே, நீதிமன்ற உத்தரவை வேண்டும் என்றே மீறியதற்காக மனுதாரர்கள் 5 பேருக்கும் தமிழக தொழில்துறை முதன்மை செயலர் ரூ.20 லட்சம் வழங்க வேண்டும். இதுதவிர உயர்நீதிமன்றம் தலைமை நீதிபதியின் நிவாரண நிதிக்கு ரூ.5 லட்சம் வழங்க வேண்டும். இந்த தொகையை 8 வாரங்களில் செலுத்த வேண்டும். இவ்வாறு நீதிபதி உத்தரவில் கூறியுள்ளார்.