கோவையில் துப்பாக்கி, தோட்டாக்களுடன் சிக்கிய 2 பேரிடம் போலீசார் கிடுக்கிப்பிடி விசாரணை- பீகாரை சேர்ந்தவரும் கைது…!

பீகாரில் இருந்து துப்பாக்கி வாங்கி வந்து ஒரு கும்பல் வைத்திருப்பதாக தீவிரவாத நடவடிக்கைகள் தடுப்பு பிரிவு போலீசாருக்கு ரகசிய தகவல் கிடைத்தது. அதன் பேரில், போலீசார் தீவிரமாக கண்காணித்து வந்தனர். இது தொடர்பாக கோவை சேரன்மாநகரை சேர்ந்த மணிகண்டன் (வயது 23), காளப்பட்டியைச் சேர்ந்த ஹரிஸ்ரீ (23) ஆகியோரை மடக்கி பிடித்து கைது செய்தனர். அவர்களிடமிருந்து துப்பாக்கியும், தோட்டாக்களும் பறிமுதல் செய்யப்பட்டன. இவர்களுக்கு துப்பாக்கி மற்றும் தோட்டாக்கள் எப்படி கிடைத்தன என்று அவர்களிடம் கிடுக்கிப்பிடி விசாரணை நடத்தப்பட்டது. அப்போது அவர்களுக்கு துப்பாக்கி விற்பனை செய்தது, பீகாரை சேர்ந்த குந்தன்ராய் (22) என்பது தெரிய வந்தது. அதன்பேரில் அவரும் கைது செய்யப்பட்டார். இவர்கள் எதற்காக துப்பாக்கியை வாங்கினர்?, கூலிப்படையாக செயல்படும் கும்பலா? , இதற்கு முன் நடந்த குற்ற சம்பவங்களில் இவர்களுக்கு தொடர்பு உள்ளதா? என்பது குறித்து தொடர்ந்து விசாரணை நடத்தப்பட்டு வருகிறது.