அவர்களுக்கே இந்த நிலைமையா?- விசாரணைக்கு சென்ற 2 போலீஸ் காரர்களை சுற்றி வளைத்து லத்தியால் தாக்கிய கும்பல்…! ( வீடியோ இணைப்பு)

விருதுநகர் மாவட்டம், ராஜபாளையம் பஞ்சு மார்க்கெட் நேரு சிலை அருகே உள்ள டாஸ்மாக்கில் கடந்த இரண்டு தினங்களுக்கு முன்னதாக மது அருந்தியவர்களுக்கு இடையே தகராறு ஏற்பட்டுள்ளது. இதில் 6 பேர் சேர்ந்து இசக்கி என்பவரைத் தாக்கி உள்ளனர். தாக்குதலில் காயமடைந்த இசக்கி, ரத்த காயங்களுடன் அங்குள்ள வடக்கு காவல் நிலையத்திற்கு சென்று புகார் அளித்துள்ளார்.  புகாரை பெற்றுக் கொண்ட காவல் துறையினர், தாக்கியவர்களை தேடியபோது அவர்கள் நேரு சிலை பின்புறம் உள்ள மற்றொரு தனியார் “பார்” அருகே இருந்துள்ளனர். அவர்களிடம், வடக்கு காவல் நிலைய போலீஸ்காரர்கள் ராம்குமார் மற்றும் கருப்பசாமி ஆகியோர் விசாரணைக்காக காவல் நிலையத்திற்கு வருமாறு அழைத்துள்ளனர். இதற்கு மறுப்பு தெரிவித்த அந்த கும்பல், போலீஸ்காரர்களிடம் வாக்குவாதத்தில் ஈடுபட்டதோடு அவர்கள் கையில் இருந்த லத்தியை பிடுங்கி அவர்களை ஆபாசமாக திட்டிக் கொண்டே சரமாரியாக தாக்கியுள்ளனர். இதுகுறித்த தகவலின்பேரில் மற்ற போலீசார் சம்பவ இடத்துக்கு விரைந்து சென்றனர். உடனே அந்த கும்பல் அங்கிருந்து தப்பி ஓடிவிட்டது. பின்னர் காயமடைந்த  2 போலீஸ்காரர்களையும் சக போலீசார் மீட்டு அரசு மருத்துவமனைக்கு அனுப்பி வைத்தனர். இதுகுறித்து தாக்கப்பட்ட போலீசார் அளித்த புகாரின்பேரில், கீழ ஆவரம்பட்டியை சேர்ந்த பால்பாண்டி, கிளிராஜன், பாஞ்சாலி ராஜா, பாண்டியராஜ் உள்ளிட்ட 9 பேர் மீது வடக்கு காவல் நிலையத்தில் வழக்குப் பதிவு செய்யப்பட்டுள்ளது. இதில் 7 பேர் கைது செய்யப்பட்ட நிலையில், இருவரை போலீசார் தேடி வருகின்றனர். போலீஸ்காரர்களை ஒரு கும்பல் லத்தியால் தாக்கும் வீடியோ சமூக வலைதளங்களில் வைரலாகி வருகிறது.