குஜராத்தில் நெஞ்சை பிளக்கும் சம்பவம்:- பட்டாசு ஆலையில் ஏற்பட்ட பயங்கர வெடி விபத்தில் 13 பேர் உடல் சிதறி பலி…!

குஜராத் மாநிலம், பனஸ்கந்தா மாவட்டம், டீசா பகுதியில் பட்டாசு ஆலை செயல்பட்டு வருகிறது. இந்த ஆலையில் இன்று(01-04-2025) வழக்கம்போல் 15க்கும் மேற்பட்ட தொழிலாளர்கள் பட்டாசு தயாரிக்கும் பணியில் ஈடுபட்டுக் கொண்டிருந்தனர். இந்நிலையில், திடீரென ஆலையில் இன்று காலை பயங்கர வெடிவிபத்து ஏற்பட்டது. இந்த வெடி விபத்தில் தீ மளமளவென பரவியது. மேலும், அந்த ஆலையின் மேற்கூரை இடிந்து தரைமட்டமானது. இந்த வெடி விபத்தில் 13 பேர் சம்பவ இடத்திலேயே உடல் சிதறி உயிரிழந்தனர். மேலும், 4 பேர் படுகாயமடைந்தனர். தகவலறிந்து விரைந்து வந்த போலீசார் மற்றும் தீயணைப்பு படையினர் படுகாயமடைந்தவர்களை மீட்டு அருகில் உள்ள மருத்துவமனையில் அனுமதித்தனர். மேலும், இந்த விபத்து குறித்து விசாரணை நடத்தி வருகின்றனர்.