தங்கம் விலை தொடர்ந்து அதிகரிப்பு: ஒரு கிராம் ரூ.10 ஆயிரத்தை நெருங்குகிறது…

சென்னையில் இன்று (செப்.01) 22 காரட் ஆபரண தங்கத்தின் விலை மீண்டும் அதிகரித்துள்ளது. சவரனுக்கு ரூ.680 உயர்ந்து ரூ.77,640க்கு விற்பனை செய்யப்படுகிறது. அதேபோல், கிராமுக்கு ரூ.85 அதிகரித்து ரூ.9,705க்கு விற்பனை செய்யப்படுகிறது. அமெரிக்க டாலருக்கு எதிரான இந்திய ரூபாய் மதிப்பு சரிவு உள்ளிட்ட காரணங்களால், நம் நாட்டில் தங்க விலை தொடர்ந்து உயர்ந்து வருகிறது. இதன் தாக்கம் தமிழக சந்தையிலும் தெளிவாகக் காணப்படுகிறது. கடந்த சனிக்கிழமை தங்க விலை சவரனுக்கு ரூ.680 உயர்ந்து, ரூ.76,960 என்ற வரலாற்று சாதனையை எட்டியது. அன்றைய தினம் கிராமுக்கு ரூ.9,620க்கு விற்பனையானது. நேற்று (ஞாயிற்றுக்கிழமை) விடுமுறை காரணமாக விலையில் மாற்றம் ஏதும் இல்லை. ஆனால் இன்று (செப்.01) தங்கம் மேலும் உயர் நிலையை எட்டி, சவரனுக்கு ரூ.77,640 என புதிய உச்சத்தைக் கண்டுள்ளது. இதன் விளைவாக தங்க விலை ரூ.78 ஆயிரத்தை நெருங்கியுள்ளது. இந்த திடீர் உயர்வால் நகைப்பிரியர்கள் அதிர்ச்சியடைந்துள்ளனர்.