திருச்சியில் விற்பனையாளர் தூக்கு போட்டு தற்கொலை: ஆன்லைன் ரம்மியில் பல லட்சத்தை இழந்ததால் துயர முடிவு…!

திருச்சி, வடக்கு காட்டூர் சோழன் நகர் 2-வது குறுக்குத் தெரு பகுதியைச் சேர்ந்தவர் கிஷோர் குமார் (வயது 32). இவரது மனைவி ஜனனி (30). இந்த தம்பதியினருக்கு ஒரு பெண் குழந்தை உள்ளது. கிஷோர் குமார் காட்டூர் பகுதியில் உள்ள எலக்ட்ரானிக்ஸ் நிறுவனத்தில் விற்பனையாளராக பணியாற்றி வந்தார். இவருக்கு ஆன்லைனில் ரம்மி விளையாடும் பழக்கம் இருந்துள்ளது. இதில் பல லட்சத்தை அவர் இழந்ததாக கூறப்படுகிறது. இதனால், மன உளைச்சலுக்கு உள்ளான கிஷோர் குமார், வீட்டில் யாரும் இல்லாத நேரத்தில் தூக்கு போட்டு கொண்டார். உயிருக்கு போராடிய அவரை உறவினர்கள் மற்றும் அருகில் உள்ளவர்கள் மீட்டு திருச்சி அரசு மருத்துவமனைக்கு கொண்டு சென்றனர், அங்கு அவரை பரிசோதனை செய்த மருத்துவர்கள் அவர் ஏற்கனவே இறந்து விட்டதாக தெரிவித்தனர். இதுகுறித்து ஜனனி கொடுத்த புகாரின் பேரில் திருவெறும்பூர் போலீசார் வழக்கு பதிவு செய்து விசாரணை நடத்தி வருகின்றனர்.